Gohed Strong Blong Givim Witnes Taem En i Stap Kam Klosap
1 Taem blong tekem ol kakae long garen hem i wan taem blong glad. Be, hem i wan taem blong hadwok tu. I gat smoltaem nomo blong hivimap ol kakae long garen, taswe ol man blong wok oli no wantem kam slak long wok ya.
2 Taem Jisas i tokbaot “en blong wol ya,” hem i yusum pijatok long saed blong wok ya blong karem kakae long garen. (Mat. 13:39) Yumi laef long ol las dei blong wol ya, mo taem blong givim witnes “long olgeta ples long wol,” hem i sot. (Mat. 24:14) From en i kam klosap finis, yumi evriwan i mas strong moa blong mekem wok blong prij. ?From wanem? Jisas i talem se: “I gat plante kakae tumas i stap long garen, be smol man nomo oli stap blong karem i go.”—Mat. 9:37, 38; Rom 12:11.
3 Oltaem Yumi Mas Strong Blong Talemaot: Taem Jisas i statem bigfala wok blong prij blong hem, hem i gat tri mo haf yia nomo blong mekem evri samting we God i sanem hem blong mekem. Hem i prij wetem tingting blong hareap long wok ya. Hem i talem se: “Mi mas talemaot gud nius ya long olgeta, se God i stap kam king blong ol man blong hem. From we God i sanem mi blong mi mekem olsem.”—Luk 4:43.
4 Jisas i mekem se tingting ya blong hareap long wok blong prij, i go dip long hat blong ol disaepol blong hem tu. (Mak 13:32-37) Hemia nao from wanem “evri dei, insaed long Haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.” (Wok 5:42) Ol wok we i no impoten tumas i no tekem faswan ples long laef blong olgeta. Nomata se i no gat plante disaepol, be oli winim wok ya blong talemaot gud nius “long olgeta man long wol.”—Kol. 1:23.
5 Yumi gat moa risen naoia blong wokem tingting ya blong hareap long wok blong prij, from we “yumi kam klosap finis long taem we ol samting blong wol ya bambae i lus.” (1 Pita 4:7) Jeova hem i putum wan dei mo taem finis blong mekem wol ya i kasem en blong hem. (Mat. 24:36) Wok blong prij bambae i mas finis long taem we i stap yet. Hemia nao from wanem yumi mas traehad moa blong mekem se gud nius ya i kasem plante moa man.
6 En blong wol ya i kam klosap finis. Sipos yumi strong moa blong mekem wok blong prij, bambae yumi save talem olsem Jisas i bin talem se: ‘Mifala i finisim ol wok ya we yu givim long mifala blong mekem.’—Jon 17:4.