Olsem Wanem Evriwan Long Famle Oli Wok Tugeta—Long Wok Blong Prij
1 I gud tumas blong luk ol hasban mo waef, ol papa mama mo ol pikinini oli joen wanples long Kristin minista wok, oli stap presem nem blong Jeova long fes blong olgeta man. (Sam 148:12, 13) I gud we olgeta famle oli gat wan program blong joen oltaem long wok blong prij. ?Famle blong yu i putumap wan dei finis blong joen long wok blong prij evri wik? Sipos yes, ale evriwan i save finis wanem we oli mas plan from mo oli save joen fulwan long wok ya.—Prov. 21:5a.
2 Bifo long dei ya we famle blong yu i jusum blong joen long wok blong prij, ?yufala i gat taem blong mekem sam pleplei tugeta blong lanem sam fastok we bambae yufala i yusum long wok blong prij? Fasin ya blong lanem ol fastok i save givhan bigwan, mo i save mekem se famle i gat trufala tingting blong wok tugeta. !I wan bigfala blesing taem wan famle i rere gud mo i joen tugeta long wok blong prij!
3 Wan seket elda i joen wetem wan famle long wok blong seremaot magasin. Elda ya i prij wetem wan pikinini gel blong famle ya. Taem tufala i stap prij long ol haos wanwan, pikinini gel ya i askem long elda ya se, “?Bambae mi prij wetem yu go kasem wanem taem?” Ale, gel ya i talem se hem i mas prij wetem papa blong hem afta. I klia se gel ya wetem papa blong hem tufala i rili laekem blong prij tugeta. !Hemia wan nambawan tingting we famle ya i gat!
4 Maet sam famle oli save mekem wok blong haftaem paenia tugeta wan taem long wan yia. No maet wan memba blong famle i save gohed long haftaem paenia evri manis no i save kam wan fultaem paenia. Taem famle i mekem gudfala plan mo gat fasin blong wok tugeta, maet evriwan i save spenem moa taem long wok prij blong sapotem hemia we i stap mekem wok blong paenia. Evriwan long famle bambae oli kasem blesing from we oli joen moa long wok blong prij mo from ol gudfala ekspiryens we oli kasem long wok blong prij.—Mal. 3:10.
5 !Taem ol famle oli joen fulwan long wok blong talemaot gud nius, samting ya i givhan long olgeta blong joengud, gat strong tingting blong prij, mekem gudfala wok we i karem frut, mo glad tumas long wok blong Jeova!—Fil. 2:1, 2.