Jeova i Tijim Yumi
1 Folem plan we God i givim, wan bigfala program blong tijim man long ful wol i stap gohed naoia long 233 kantri. I no gat wan program long wol ya we i save givim wan tijing we i sem mak long program ya. Bigfala Tija blong yumi, Jeova, i stap tijim yumi blong yumi save kasem blesing naoia, be tu, hem i stap rerem yumi blong kasem laef we i no save finis long fiuja.—Aes. 30:20; 48:17.
2 Ol Skul We Oli Givim Edukesen Long Saed Blong God: Tingbaot ol skul we oli stap gohed naoia blong halpem ol man blong Jeova. Evri wik, i gat Tiokratik Skul long samwe 87,000 kongregesen. Skul ya i halpem plante milyan pablisa blong Kingdom blong gat gudhan long wok blong talemaot gud nius. ?Yu yu putum nem blong yu finis long skul ya? ?Yu yu joen long Skul blong Paenia olsem plante taosen pablisa oli mekem finis? From we aoa blong ol fultaem paenia i jenis, maet i gat moa man we oli kam paenia mo we bambae oli save joen long Skul blong Paenia. Ministeriol Trening Skul, wan kos blong tu manis, i stap naoia long sam stamba lanwis we ol man raonabaot long wol oli stap yusum. Skul ya i halpem ol elda we oli no mared yet mo ol man blong givhan, blong mekem plante moa tiokratik wok. Sam samtaem, olgeta elda mo man blong givhan oli save kasem sam spesel tijing long Kingdom Ministri Skul.
3 I gat tri spesel skul we oli stap mekem long ol haos blong Wajtaoa Edukesen Senta long Pateson, Nyu Yok, blong givim spesel tiokratik trening. Wajtaoa Baebol Skul Blong Gilead, wan kos blong faef manis, i tijim man blong mekem wok blong misinari long narafala kantri. Ol memba blong ol Branj Komiti raon long wol oli joen long wan skul blong tu manis, long saed blong wok long ol Branj ofis. Long Mei 1999, wan niufala klas i stat, mo i gat 48 studen blong Yunaeted Stet mo Kanada we oli joen long hem. Kos ya blong tu manis, i blong ol elda we oli stap visitim ol kongregesen. Ol man blong Jeova oli stap kasem gudfala blesing from trening we Jeova i stap givim tru long ol defren skul ya.
4 ?From Wanem Yumi Kasem Tijing Olsem? Wan memba blong Hed Kampani i talem se: “Program ya blong tijim ol man i blong givhan long ol man blong Jeova we oli stap long olgeta ples long wol, blong oli kam bigman long saed blong spirit olsem we Ol Proveb 1:1-4 i tokbaot.” Yes, bambae Jeova i gohed blong givim long yumi wanwan, ‘tang blong ol man we hem i tijim.’—Aes. 50:4.