Ansa Long Wan Kwestin
◼ ?I wok blong hu blong klinim Haos Kingdom?
Wan naesfala Haos Kingdom we i klingud, i laenap wetem mesej we yumi stap talemaot. (Skelem wetem 1 Pita 2:12.) I rili impoten blong mekem Haos Kingdom i klin. Yumi wanwan i save joen blong mekem se hem i stap klin oltaem. Yumi no mas ting se sam long yumi nomo bambae i lukaot long bigfala wok ya. Plante taem, ol Buk Stadi blong Kongregesen oli mekem plan blong klinim Haos Kingdom. Man we i stap lidim Buk Stadi no man we i givhan long hem, tufala i mas soem eksampol. Taem i gat plante kongregesen we oli yusum wan Haos Kingdom, ol elda bambae oli mekem plan blong olgeta kongregesen wanwan oli serem wok ya blong klinim Haos Kingdom.
?Olsem wanem yumi save givim bes blong yumi long saed blong wok ya? Yumi mas folem gud program we i stap blong klinim Haos Kingdom. I gud sipos oltaem i gat evri samting we yumi nidim blong klinim haos i stap rere. Wan lis blong olgeta samting we yumi mas mekem, i mas stap long wan ples we olgeta man we oli wok blong klinim, oli save jekem blong luk wanem we maet oli save mekem. Ating yumi save mekem tu defren kaen lis. Wan lis blong talem ol smosmol samting we yumi mas mekem afta long evri miting, mo wan narafala lis blong talem wanem blong mekem long taem blong bigfala klinap evri wik. Man we i stap lidim Buk Stadi i mas jusum dei mo taem we i isi long ol brata sista blong klinim Haos Kingdom. I gud tu blong tingbaot gras long yad, ol flaoa mo ol smosmol tri. I no mas gat doti i stap long ples blong putum trak. Evri yia bambae i gat wan bigfala klinap, maet jes bifo Memoriol. I gud sipos long taem ya kongregesen i wasem ol windo, ol wol, ol kapet mo narafala kaliko blong Haos Kingdom.
Tru tumas, yumi evriwan i save givhan bigwan blong mekem se wok ya i no hevi tumas, sipos yumi no sakem jinggom mo narafala doti olbaot insaed no afsaed long Haos Kingdom. Afta we yumi go long toelet, yumi mas livim ples i stap klin blong narafala man we bambae i kam. Lukaot gud blong no spolem no brekem olting blong Haos Kingdom. Makemgud sipos yu luk doti long ol kapet, sam jea we oli kam nogud, wan paep wota we i lik, ol laet we oli no wokgud, mo narafala samting olsem. Ale, kwiktaem yu mas talemaot samting ya long brata we i lukaot long ol wok blong klinim Haos Kingdom.
Yumi evriwan i mas glad blong joen long wok ya. Bambae yumi gat wan naesfala haos wosip we i givim ona long God, mo from we yumi klin, samting ya bambae i makemaot ol man blong God se oli defren long ol man blong wol.—1 Pita 1:16.