?Wanem i Save Halpem Yumi Blong Stanap Strong Long Bilif?

¹ !Taem we yumi stat blong joen wetem ogenaesesen blong Jeova, yumi bin glad tumas blong gruap long saed blong spirit! Be yet, blong stap ‘holem strong, stanap strong mo kam strong moa oltaem,’ yumi nidim blong gru oltaem long saed blong spirit. (Kol. 2:​6, 7) Nating se plante long yumi oli gohed strong long saed blong spirit, i gat sam we oli gowe from we oli no ‘stanap strong long bilif blong olgeta.’ (1 Kor. 16⁠:13) Yumi save blokem samting ya blong i no hapen long yumi. ?Olsem wanem?

² Gohed Oltaem Blong Mekem Ol Samting Long Saed Blong Spirit: Stanemap wan gudfala rod blong gohed oltaem insaed long ogenaesesen blong Jeova. Long ples ya, ol nid blong yumi long saed blong spirit oli fulap i stap gud. Ol miting blong kongregesen, mo ol asembli oli pusum yumi blong gru moa long saed blong spirit mo blong stanap strong. Yumi save gohed blong kasem ol gudfala frut sipos yumi kam oltaem long olgeta miting ya. (Hib. 10⁠:​24, 25) Rod blong gohed oltaem blong ridim Baebol, ol Wajtaoa mo Wekap!,mo ol buk we oli tokbaot ol strong kakae blong Tok blong God, bambae i mekem se yumi save gru mo kam strong moa long saed blong spirit olsem we rus blong tri i go dip moa insaed long graon. (Hib. 5:​14) Yumi wanwan i save putum sam mak long saed blong spirit mo wok had blong kasem ol mak ya. Samting ya bambae i karem blesing we i save stap longtaem.​—⁠Fil. 3:​16.

³ Help We i Kam From Olgeta We Oli Bigman: Lukaot ol jans blong kampani moa wetem olgeta we oli bigman long saed blong spirit insaed long kongregesen. Traem save gud ol elda, from we olgeta nao oli faswan we oli save mekem yumi kam strong. (1 Tes. 2:​11, 12) Obei long eni advaes no gudfala tingting we maet oli givim long yu. (Efes. 4:​11-​16) Ol man blong givhan tu, oli intres blong givhan long ol narafala blong oli kam strong long bilif. Taswe i gud blong lukluk i go long ol brata ya blong oli save leftemap tingting blong yumi.

⁴ ?Yu yu nidim help long minista wok blong yu? Toktok wetem ol elda, mo askem help. Maet bambae oli save putum nem blong yu long program blong ‘Ol Paenia Oli Halpem Ol Narafala.’ ?Yu yu jes baptaes nomo? Taem yu stadi long buk ya Ol Rul Blong Mekem Minista Wok mo folem ol advaes blong hem long laef blong yu, bambae samting ya i save mekem we yu gru long saed blong spirit. ?Yu yu wan papa no mama? Yu yu mas gohed oltaem blong mekem ol pikinini blong yu oli strong long saed blong spirit.​—Efes. 6⁠:⁠4.

⁵ Taem yumi stanap strong mo no kam slak long saed blong bilif, bambae yumi save haremgud long wan gudfala fasin fren wetem Jeova mo gudfala kampani wetem ol brata blong yumi. Samting ya i save halpem yumi blong stanap strong agensem Setan we i wantem spolem yumi. Mo tu, samting ya i mekem hop we yumi gat long saed blong wan fiuja we i no save finis, i kam strong moa.​—1 Pita 5:9, 10.