Yumi Rere Blong Givhan
1. ?Olsem wanem wan man i save kam slak long saed blong spirit?
1 Anna i wan sista we hasban blong hem i no bilif, mo tu, wok blong Anna i tekem fulap taem blong hem. Hem i faenem i had blong joen oltaem long ol Kristin miting, blong joen long wok blong prij, mo blong stadi long Tok blong God. Nating se hem i laekem Jeova, be hem i kam slak. Hem i glad taem ol elda we oli tingbaot hem, oli kam givhan long hem long saed blong spirit.
2. ?Long wanem rod evri Kristin oli save givhan long ol narafala?
2 Taem yumi agri long help long saed blong spirit we Kristin kongregesen i givim, hemia i soemaot se yumi stap dipen long Jeova. Olsem Jisas Kraes we i givhan long ol narafala wetem lav, ol elda long kongregesen oli lukaotem rod blong leftemap tingting mo givhan long olgeta we oli faenem i had blong gohed long saed blong spirit. (1 Tes. 5:14) Plante taem, i jes nidim smol toktok we i kaen mo i leftemap tingting mo we i stanap long sam vas blong Baebol. I no ol elda nomo we oli mas tekem faswan step blong givhan long olgeta we oli slak, be evri Kristin oli mas mekem olsem. Yumi evriwan i luk finis se “tok we wan man i talem [long yumi] long prapa taem blong hem” i gat paoa.—Prov. 25:11, NW; Aes. 35:3, 4.
3, 4. ?Yumi save mekem wanem blong givhan long ol narafala, mo olsem wanem yumi save mekem olsem?
3 Tekem Faswan Step: Blong soemaot intres mo lav long olgeta we oli nidim help, yumi mas tekem faswan step, soem sore long olgeta, mo yumi mas glad blong givhan long olgeta. Taem Jonatan i kasem save long trabol we Deved i fesem, hem i “kam luk hem long ples ya [Hores], i leftemap tingting blong hem.” (1 Saml. 23:15, 16) Yumi givhan long ol narafala taem yumi kaen long olgeta. Ol gudfala tok we yumi talem from we yumi intres long olgeta, i save karem gudfala frut. Mo tu, Jisas i talem wan pijatok we i soemaot se yumi mas wok had mo gat strong tingting taem yumi traehad blong halpem wan brata no sista long saed blong spirit. (Luk 15:4) Sipos yumi wantem tumas blong givhan long narafala, tingting ya bambae i pusum yumi blong gohed nomo blong givhan long man ya, nating sipos hem i no stap gohed kwik.
4 !I gud tumas sipos yumi tekem faswan step blong askem ol narafala, olsem olgeta long buk stadi blong yumi, blong oli joen wetem yumi long wok blong prij! Taem yumi stap givhan long wan man blong Jeova blong i joen long wok blong prij, yumi save yusum janis ya blong leftemap tingting blong hem blong i mekem moa long wok blong God. Ol gudfala taem ya we yumi spenem tugeta blong mekem wok blong Jeova, oli rili leftemap tingting blong olgeta we oli stap kam strong bakegen long saed blong spirit.
5. ?Ol elda oli save givhan olsem wanem?
5 Wan Plan We i Stanap Long Lav: Olgeta we oli no moa joen long wok blong prij mo wetem kongregesen, maet oli nidim sam narafala help tu blong mekem bilif blong olgeta i kam strong bakegen. Ating oli nidim blong stadi long wan buk olsem Wosipim Trufala God, Draw Close to Jehovah (Franis/Inglis), no ?Wanem Samting We Baebol i Rili Tijim? From we man ya i baptaes finis, plante taem i no nid blong stadi longtaem wetem hem. Kongregesen Seves Komiti i mas luklukgud blong kasem save se hu bambae i nidim help olsem.—Lukluk Ansa Long Wan Kwestin long Kingdom Wok Blong Yumi blong Novemba 1998 mo Novemba 2000.
6. ?Olsem wanem wan sista i kam strong bakegen long saed blong spirit?
6 Anna, we yumi bin tokbaot long faswan haf, i glad long help we ol elda oli givim, taem oli mekem plan se wan sista we i strong long saed blong spirit bambae i stadi wetem hem. Tufala i stadi fo taem nomo nao hemia i naf blong givhan long Anna blong i kam klosap long Jeova bakegen. Anna i stat bakegen blong joen long ol miting blong kongregesen, mo hem i wantem presem Jeova God long fored blong ol man bakegen. Sista ya we i strong long saed blong spirit i givhan long hem long wok blong prij tu. Hem i tekem Anna wetem hem long ol Baebol stadi gogo kasem we hem i strong naf blong prij long ol haos wanwan. !Anna i jes nidim we narafala i givhan long hem blong i gohed bakegen long saed blong spirit!
7. ?Wanem ol blesing we oli kamaot taem yumi mekem narafala i kam strong bakegen long saed blong spirit?
7 Taem yumi mekem olgeta we oli slak oli kam strong bakegen, hemia i karem blesing long evriwan. Brata no sista we i kasem help i glad from we hem i kam klosap long Jeova bakegen mo i joen long ol wok long ogenaesesen blong Hem. Ol elda oli glad blong luk we hem i gohed gud long saed blong spirit. (Luk 15:5, 6) Kongregesen i joengud taem evriwan oli lavlavem olgeta. (Kol. 3:12-14) !Hemia ol gudfala risen blong folem fasin blong Jeova, God ya we i rere blong givhan oltaem!—Efes. 5:1.