Ansa Long Wan Kwestin

◼ ?I stret we wan elda blong Sevis Komiti blong Kongregesen, i askem long wan brata no wan sista blong stadi Baebol wetem narafala brata no sista we i no moa prij?

Ol elda oli gat responsabiliti blong lukaot long kongregesen, samting ya i minim se oli mas lukaot tu long ol brata no sista we oli no moa prij. Ol elda oli visitim ol pablisa ya, mo oli traem faenem olsem wanem blong givhan long olgeta. Sipos i gat nid blong mekem olsem, maet ol elda oli askem wan brata no wan sista blong stadi Baebol wetem pablisa ya we i no moa prij. Buk ya, Ol Rul Blong Mekem Minista Wok Blong Yumi, long pej 99, i talem se Sevis Komiti blong Kongregesen i mas tekem disisen se hu bambae i kasem help ya.

Elda we i lukaot long wok blong prij i jusum wan brata no wan sista we i naf gud blong givhan long pablisa ya we i no moa prij. Mo tu hem i jusum wanem samting we bambae oli mas tokbaot long stadi mo weswan buk i save givhan moa long pablisa ya. Ating brata no sista we i bin mekem stadi long pablisa ya fastaem, i save halpem hem bakegen. No maet wan narafala brata no sista we pablisa ya i save gud mo i gat respek long hem, i save halpem hem. Wan sista we i gat gudhan, mo we i strong long saed blong spirit, i save givhan long wan sista we i no moa prij. I no nidim we wan narafala i folem brata no sista ya we elda i jusum blong go mekem stadi. Taem elda i jusum wan pablisa blong mekem wan stadi olsem, pablisa ya i mas kaontem taem, ol visit, mo stadi ya long ripot blong hem.​—⁠Lukluk Kingdom Wok blong Yumi blong Novemba 1987, pej 1, 2 (Engglis mo Franis).

Studen we i kasem help ya i baptaes finis, taswe i no gat nid blong mekem stadi ya longtaem tumas. Mak blong stadi ya, i blong halpem brata no sista ya we i no moa prij, blong kambak long olgeta miting blong kongregesen, mo blong joen evri wik long wok blong talemaot gud nius. Elda we i lukaot long wok blong prij bambae i jekem wanwan taem, blong save olsem wanem stadi ya i gohed. Wetem fasin lav, kongregesen i halpem ol brata mo sista ya, blong mekem se oli kam naf blong karem ol prapa responsabiliti blong olgeta long fored blong Jeova. Hem i givhan long olgeta blong stanap strong long trutok, “olsem we rus blong tri i holemtaet graon, olsem we haos i fas strong long graon we i stanap long hem.”​—Efes. 3:​17; Gal. 6:5.