No Fogetem Olgeta We Oli Kam Slak
1. ?From wanem yumi mas glad blong leftemap tingting blong olgeta we oli kam slak?
1 ?Yu yu save wan brata no sista we i slak long trutok? Maet hem i no moa joen wetem kongregesen, ale hem i lusum rod. Maet yu mitim hem taem yu stap prij long ol haos wanwan. Yumi mas tingbaot se hem i stap yet olsem wan brata no sista blong yumi long saed blong spirit. Yumi wantem soemaot se yumi lavem hem, mo yumi wantem givhan long hem blong i kambak long kongregesen mo long ‘Kraes we i olsem man blong lukaot long sipsip, we hem i prapa man blong lukaot long laef blong yumi.’—1 Pita 2:25.
2. ?Olsem wanem yumi save leftemap tingting blong wan brata no sista we i slak?
2 Soem Se Yumi Intres: Sipos yumi tekem smol taem blong toktok long telefon no yumi visitim wan we i slak, yumi soemaot se yumi stap tingbaot hem. ?Yumi save tokbaot wanem long hem? Sipos yumi talem long brata ya se yumi stap tingbaot hem, hemia nomo i save leftemap tingting blong hem. Yumi save tokbaot ol gudfala samting we i save mekem bilif blong hem i kam strong. (Fil. 4:8) Yumi save tokbaot wan poen we yumi laekem, we yumi bin harem long miting. Mo tu, yumi save singaot hem blong i kam long wan miting no asembli, mo askem hem sipos yumi save blokem wan jea blong hem no sipos yumi save go from hem.
3. ?Wanem i givhan long wan sista blong i gohed bakegen blong mekem wok blong Jeova?
3 Wan pablisa i stap prij mo i faenem wan sista we i no moa joen wetem kongregesen i bitim 20 yia finis. Pablisa i askem sipos sista ya i wantem stadi Baebol, be sista i no wantem. Nating se i olsem, pablisa ya i gohed blong visitim hem mo givim ol niufala magasin long hem. Afta long distrik asembli, pablisa ya i go luk sista ya mo i tokbaot sam poen blong asembli, mo biaen, sista i stat bakegen blong mekem wok blong Jeova.
4. ?Bambae yumi mekem wanem taem wan we i slak i stat joen bakegen long ol miting?
4 Taem Wan i Kambak: ?Sipos wan brata no sista we i slak i stat blong joen bakegen long ol miting, bambae yumi mekem wanem? ?Taem ol disaepol blong Jisas oli lego hem blong smoltaem, hem i mekem wanem long olgeta? Hem i tokbaot olgeta wetem lav mo i talem se oli “brata” blong hem mo hem i soem se hem i trastem olgeta. Mo tu hem i givim wan impoten wok long olgeta. (Mat. 28:10, 18, 19) I no longtaem afta, oli bisi blong talemaot gud nius we oli no stop nating.—Wok 5:42, NW.
5. Tokbaot sam samting long saed blong wan we i slak we yumi mas toktok long ol elda from.
5 Bifo we yumi askem long wan brata no sista we i slak sipos hem i glad we yumi mekem stadi blong hem, no blong hem i joen wetem yumi long wok blong prij, yumi mas toktok wetem ol elda fastaem. Sipos yumi stap prij nao yumi faenem wan pablisa we i slak, yumi mas talemaot long ol elda blong oli save givhan long hem.
6. ?Wanem glad we bambae yumi kasem sipos yumi givhan long olgeta we oli slak?
6 Baebol i soemaot klia se God bambae i sevem olgeta ya nomo we oli stanap strong gogo kasem en. (Mat. 24:13) Taswe, yumi mas intres long olgeta we oli foldaon no we oli lusum rod. Sipos yumi intres long olgeta mo yumi gat longfala tingting blong soem lav olsem Jeova, bambae yumi kasem bigfala glad taem yumi luk olgeta oli stat bakegen blong mekem wok blong God wetem yumi.—Luk 15:4-10.