Ansa Long Wan Kwestin
◼ ?Olsem wanem yumi save givhan long wan man we i no moa joen longtaem long ol tiokratik wok, blong i save kam naf bakegen blong mekem wok blong wan pablisa blong gud nius?
Yumi glad bigwan taem wan man we i no bin joen long ol tiokratik wok blong longtaem i soemaot se hem i wantem, wetem fulhat blong hem, blong mekem wok blong Jeova bakegen. (Luk 15:4-6) Ating man ya i bin letem ol narafala we oli agensem hem no ol hadtaem blong laef oli blokem hem blong mekem stadi hem wan, kam long ol miting, mo joen long wok blong prij. ?Wanem beswan rod blong givhan long hem blong gru long saed blong spirit?
Yumi evriwan i mas tekem faswan step blong soemaot long man ya se yumi gat trufala Kristin lav long hem. Ol elda bambae oli traem faenemaot kwiktaem wanem ol spesel nid we hem i gat long saed blong spirit. (Jem. 5:14, 15) Sipos man ya i bin slak blong smoltaem nomo, maet wan pablisa we i gat gudhan long wok blong prij i naf blong givhan long hem blong stat bakegen long wok ya. Be, sipos man ya i no bin joen wetem kongregesen blong longtaem lelebet, maet bambae hem i nidim moa help. Blong bildimap bilif blong hem bakegen mo mekem hem i gat fasin tangkiu long God, maet i gud blong mekem Baebol stadi bakegen wetem man ya long wan buk we i stret long nid blong hem. Long taem olsem, elda we i lukaot long wok blong prij, bambae i mekem plan wetem wan pablisa we i naf blong mekem stadi ya. (Hib. 5:12-14; lukluk Wan Kwestin we i stap long Kingdom Wok Blong Yumi blong Novemba 1998.) Sipos yu gat save long wan man we i nidim help olsemia, toktok wetem elda we i lukaot long wok blong prij long kongregesen blong yu.
Bifo we yumi tekem wan man we i no prij longtaem i go wetem yumi long wok blong prij bakegen, i gud sipos tu elda tufala i storian wetem hem fastaem blong luk sipos hem i naf blong mekem wok olsem wan pablisa blong Kingdom. Bambae oli folem semfala rod we oli yusum taem oli storian wetem wan niuwan we i wantem kam wan pablisa blong gud nius. (Lukluk Wajtaoa long Inglis blong Novemba 15, 1988, pej 17.) Hemia we i no moa prij longtaem, i mas rili wantem blong serem gud nius wetem ol narafala. Mo tu, hem i nidim blong folem ol stamba rul we oli stap long pej 93-94 long buk ya Ol Rul mo hem i mas traehad blong kam long olgeta miting blong kongregesen.
Man ya we i kambak, i mas folem wan gudfala program long saed blong spirit. Samting ya bambae i mekem hem i kam strong bakegen mo bambae i givhan long hem blong holemtaet gudfala fasin fren we hem i gat wetem Jeova mo gohed blong wokbaot long rod we i go kasem laef we i no save finis. (Mat. 7:14; Hib. 10:23-25) Sipos hem i “traehad” mo i mekem ol Kristin fasin oli wok oltaem long laef blong hem, bambae hem i strong naf blong no moa gobak olsem fastaem, taem we hem i wan Kristin disaepol we i ‘stap nating nomo . . . mo i no save karem frut.’—2 Pita 1:5-8.