Epril—!Wan Taem Blong Wok Strong Long Ol Gudfala Wok!
1 Taem wan hariken i stap kam klosap long wan ples we i gat fulap man, i impoten tumas blong givim woning long ol man long saed blong denja ya. Moa we hariken ya i stap kam klosap, moa we woning i mas goaot. ?From wanem? !From we laef blong ol man i stap long denja! Samfala man, maet oli no bin harem ol faswan woning. Sam narafala, maet oli harem woning be oli ting nating long hem, oli no wantem tekem aksin. Samting ya i sem mak long woning blong God we hem i givim long yumi blong talemaot. Woning i mas goaot bifo we “bigfala win” blong kros blong God we i folem stret fasin, i blu, i tekemaot olgeta fasin blong rabis wol ya. (Prov. 10:25) !Plante man oli stap long denja ya we oli save lusum laef blong olwe! Yumi mas givim woning long olgeta. Yumi mas “wok strong long ol gudfala wok.”—Taet. 2:11-14, NW.
2 Blong plante yia finis, ol man blong Jeova oli bin kasem ol gudfala advaes we i pusum olgeta blong mekem manis blong Memoriol i kam wan spesel taem blong wok strong long minista wok. Long 1939, long taem ya we ol tri oli stat putum flaoa, Informant, nem blong Kingdom Wok long taem ya, i talem tok ya we i leftemap tingting se: “Naoia, yumi stap kam klosap long taem ya we ol tri oli putum flaoa, mo gudfala weta. Taswe, i gud we ol pablisa blong kongregesen mo ol paenia, oli spenem moa aoa long wok blong prij. Manis Epril i gat faef Sande evriwan. Mo tu, hem i gat faef Sarede. Taswe, evri Sarede mo Sande long Epril . . . i wan spesel taem blong givim witnes.” !Hemia wan nambawan mak we ol brata mo sista oli traem kasem, 60 yia bifo! Long yia ya, olsem long 1939, manis Epril i gat faef ful wiken. ?Wanem ol plan blong yu long manis ya? ?Wanem samting we yu makemdaon long kalenda blong yu long saed blong Epril 2000? Yes, mekem plan blong wok wetem olgeta man blong Jeova long spesel manis ya we bambae ol wok long saed blong spirit oli spid moa.
3 Wanem We Yumi Gat Strong Tingting Blong Mekem: Long yia 2000, dei we i impoten moa bitim ol narafala dei i foldaon long manis ya. Dei ya, hem i Epril 19, hemia dei blong tingbaot ded blong Jisas. I gud yumi wok strong moa blong singaot plante man oli kam long Memoriol. Olsem yumi bin luk las manis, i gud blong mekem wan lis blong olgeta we bambae yumi singaot olgeta oli kam long Memoriol, mo jekem lis ya bakegen blong mekem sua se yumi no mestem wan long olgeta. Yumi save singaot ol pablisa we oli kam slak, olgeta Baebol stadi, ol visit, olgeta we oli bin stadi bifo, olgeta we yumi wok wetem olgeta, ol fren long skul, ol man klosap long yumi, ol famle, mo ol narafala man we yumi save olgeta. ?Olgeta evriwan we oli wantem kam, oli gat transpot? Sipos oli no gat transpot, ?yu save halpem olgeta wetem lav? Long naet blong Memoriol, bambae yumi gat jans ya blong mekem welkam long olgeta we oli kam joen wetem yumi. Afta long taem blong Memoriol, yumi save visitim olgeta we oli intres blong givhan long olgeta long saed blong spirit.
4 Fasin ya blong “wok strong long ol gudfala wok” bifo mo afta long dei blong Memoriol, i wan nambawan rod blong soem long Jeova se yumi rili gat tangkiu from samting we hem i mekem blong sevem yumi. Long plante ples, hemia wan taem we weta i gud, taswe, bambae plante long yumi i save mekem moa traehad long wok blong talemaot gud nius. Sipos yu wan haftaem paenia, bambae yu wantem mekem bes blong yu blong spenem 50 no bitim 50 aoa long wok blong prij. (Mat. 5:37) Folemgud program we yu bin mekem long stat blong manis. (Pri. 3:1; 1 Kor. 14:40) Yumi ol narafala, i gud we yumi tu i mekem bes blong yumi blong sapotem ol paenia, taem yumi leftemap tingting blong olgeta, no taem yumi wok wetem olgeta long wok blong prij. (Skelem wetem 2 King 10:15, 16.) Sipos yumi wok strong blong sakem plante sid long manis Epril, yumi save kasem bigfala glad mo bambae Jeova i blesem yumi. (Mal. 3:10) Maet samting ya bambae i halpem yumi blong gohed long wok blong haftaem paenia no blong kam fultaem paenia. Long ol manis we oli kam biaen, i gud we yumi gohed long bigfala wok long saed blong spirit, taem yumi wok strong oltaem blong talemaot Kingdom.
5 I sua se long manis ya, bambae plante taosen man blong Jeova oli statem plante moa Baebol stadi. ?Yu yu wantem wan Baebol stadi? I gud yu prea, yu askem God blong givhan long yu long saed ya mo wok folem prea blong yu. Yu save sua se bambae Jeova i glad long prea we yu mekem wetem tingting daon, blong askem hem blong i givhan long yu blong faenem wan man we hat blong hem i stret blong yu tijim hem.—1 Jon 3:22.
6 Hemia wan rod blong statem storian we i wok gud. Yu save stat olsem se: “Taem yumi tingbaot ol raf fasin we oli stap kamaot long ol pablik skul tede, ?yu ting se samting ya i wok blong Setan, no hem i from we papa mama i no trenem ol pikinini?” Letem man i ansa. Sipos hem i talem se “Setan,” ridim Revelesen 12:9, 12, mo makem se Setan i stamba blong olgeta trabol we oli mekem wol ya i kam nogud. Biaen, openem buklet Wanem long stadi 4, mo askem hem sipos hem i bin tingting samtaem se Setan i kam weples. Ale ridim mo tokbaot tufala faswan paragraf. Be sipos man ya i talem se ol raf fasin oli kamaot long skul from we “papa mama i no trenem ol pikinini,” ridim 2 Timoti 3:1-3 mo makem ol fasin we oli mekem se problem ya i kamaot. Biaen, openem buklet Wanem long stadi 8, ridim paragraf 5, mo gohed long storian. Sipos yu mekem plan blong kam luk hem bakegen nekis taem, maet visit ya bambae i lidim yu blong statem Baebol stadi wetem hem. Taem yu stap gohed blong visitim hem, askem hem sipos hem i save wan man we i gat intres blong harem wanem we hem i stap lanem.
7 Wan narafala rod blong “wok strong long ol gudfala wok” long Epril, hemia blong joen long ol defren kaen rod blong prij. ?Yu bin tingbaot blong prij long ol man long ples blong putum trak? ?Long ples blong tekem bas? ?No yu wantem traem blong prij long telefon, long rod, no long ol ofis? ?From wanem yu no wantem prij long ol ples ya long manis ya? Bambae Jeova i halpem yu blong gat strong tingting taem yu mekem olsem. (Wok 4:31; 1 Tes. 2:2b) Maet yu save plan blong wok wetem wan paenia no wan pablisa we i gat ekspiriens long saed ya.
8 Pablisa we i wantem tumas blong joen long wok ya blong givim witnes bambae i wantem tekem jans blong prij. Oltaem, samting we i nidim hemia blong storian wetem man long kaen fasin. Jusum wan poen we ol man oli intres long hem, maet yu save yusum rod ya we paragraf 6 i tokbaot blong statem storian. Traehad blong yusum gud evri menet, we maet yu save lusum. Yumi no save sakem 5 vatu, 10 vatu, no 50 vatu jes from we mane ya i no kasem 100 vatu, nogat. ?Taswe, from wanem yu no wantem yusum gud 5 menet, 10 menet, no 15 menet blong tekem jans blong prij?
9 Wan Taem Blong Tingtingbak: Tingtingbak long ol poen we oli kamaot klia long drama long Distrik Asembli blong las yia “Profet Tok We i Kamaot Long God.” Drama ya we nem blong hem, Gat Tangkiu From Presen We Yumi Kasem Long Saed Blong Spirit, i mekem yumi tingting gud se Jekob mo Esao tufala i no sem mak. Esao i talem se hem i gat sem intres long ol samting long saed blong spirit olsem Jekob, be nogat. Ol wok we Esao i mekem oli soem se tok ya blong hem i no tru. (Jen. 25:29-34) !Hemia i wan strongfala woning long yumi! I gud we yumi mekem olsem Jekob, yumi rere blong traehad, no faet, blong kasem blesing we Jeova i save givim long yumi. (Jen. 32:24-29) I gud yumi yusum manis Epril mo ol manis we oli kam biaen, blong traehad moa blong soem se yumi no ting nating long ol samting long saed blong spirit.
10 “Bigfala Dei ya blong Hae God i kam klosap finis. I no longtaem, bambae i kamtru.” (Sef. 1:14) Yes, yumi mas talemaot gud nius blong Kingdom. !Laef blong ol man i stap long denja! I gud we manis ya i kam olsem wan blesing long ol man blong Jeova, taem yumi joen wanples blong soem se yumi stap “wok strong long ol gudfala wok.”
[Bokis blong pija long pej 4]
Ol Samting Blong No fogetem Long Memoriol
Lafet blong Memoriol long yia ya i stap long naet blong Wenesde, Epril 19. Ol elda oli mas tingbaot ol samting ya:
◼ Jekem taem blong Memoriol, blong mekem sua se bambae yufala i pasem bred mo waen i goraon afta we san i godaon.
◼ Olgeta man, wetem brata we i givim tok tu, oli mas save stret taem mo ples blong miting ya.
◼ Mekemrere bred mo waen we i stret long lafet ya.—Lukluk Wajtaoa blong Febuwari 15, 1985, pej 19 (Inglis).
◼ Karem sam plet, glas, wan tebel mo kaliko blong hem, oli kam long Haos Kingdom, mo mekemrere olgeta bifo long taem blong miting.
◼ Klinimgud Haos Kingdom no haos miting bifo long taem blong Memoriol.
◼ Jusum ol man blong welkam mo ol man blong pasem bred mo waen i goraon, mo eksplenem wok blong olgeta samtaem bifo long Memoriol.
◼ Mekem plan blong pasem bred mo waen long ol tabu Kristin we oli sik mo oli no save kam long Memoriol.
◼ Sipos plante kongregesen oli yusum wan Haos Kingdom wantaem, ol kongregesen ya oli mas wokgud tugeta blong i no gat fulap man long doa, vranda, long rod, mo long ples blong putum ol trak.