‘Yumi No Save Stap Kwaet’
1 Jisas Kraes i stap lukaot gud long wok blong prij. (Mat. 28:20; Mak 13:10) Nating se i gat klosap sikis milian man we oli stap prij long 234 kantri, yumi no mas ting se wok blong prij i finis. Go kasem taem ya we God i talem se wok i finis, ‘yumi no save stap kwaet’ yumi mas gohed blong tokbaot ol samting we yumi lanem finis.—Wok 4: 20.
2 Yumi Mas Trastem Spirit Blong God: Setan i traehad blong mekem tingting blong yumi i foldaon. (Rev. 12:17) Prapa bodi blong yumi we i gat sin, hem tu i mekem yumi trabol. Olgeta samting ya oli save pulum tingting blong yumi blong no moa tingbaot impoten wok ya blong prij. Nating se i olsem, sipos yumi trastem Jeova, bambae spirit blong hem i save givhan long yumi blong fesem ol traem ya.
3 Taem ol man oli mekem bigfala trabol agensem Kristin kongregesen blong faswan handred yia, ol brata oli prea long God blong hem i halpem olgeta blong oli stanap strong blong talemaot tok blong hem. Jeova i ansarem prea blong olgeta, i mekem olgeta oli kam fulap long tabu spirit, mo oli gat paoa mo strong tingting blong gohed long wok blong prij. From samting ya, oli save gohed blong talemaot gud nius.—Wok 4:29, 31; 5:42.
4 Yumi No Mas Fraet Long Ol Nogud Toktok: Tingting blong narafala mo ol nogud toktok long saed blong yumi, oli save mekem yumi fraet lelebet. Be yumi mas tingbaot tok ya we Pita mo ol narafala aposol oli talem long fored blong Sanhedrin, long Ol Wok 5:29-32. Gamaliel, wan tija blong Loa, i agri se i no gat samting we i save blokem wok blong God. Wok blong prij i no kamaot long paoa blong yumi. !Bigfala wok ya i kamaot long God, mo hem wan nao i save wokem hem!—Sek. 4:6.
5 Evri dei, yumi mas prea long Jeova blong i givim spirit blong hem, blong givhan long yumi blong talemaot gud nius. I gud we yumi folem eksampel blong Jeremaea, we i talem se tok blong Kingdom i stap bon olsem faea insaed long tingting blong hem. (Jer. 20:9) !Yumi no save stap kwaet!