!Laef Blong Plante Man i Stap Long Denja!
1 Baebol i talem klia se Jeova “i wantem sevem olgeta man.” Be i tru tu se sipos ol bilian man long wol oli wantem gat wan gudfala laef long fiuja, samting ya bambae i dipen long fasin we oli gat long fored blong Jeova God mo Kingdom blong hem we Jisas Kraes i rul long hem. Fasin ya i stanap nomo long ‘stret save long trutok.’ (1 Tim. 2:3, 4) Yumi save finis se i no longtaem wol bambae i kam klin we i no moa gat ol rabis fasin, mekem se niufala wol blong God we stret fasin nomo i stap long hem, i save kamtru. Be long semtaem yumi gat wan impoten wok blong mekem, hemia blong sevem laef blong ol man.—Mat. 24:14; 28:19, 20; Rom. 10:13-15.
2 ?From Wanem Hem i Impoten? Jisas i givim woning se bambae i gat wan “bigfala trabol tumas, we neva man i luk olsem bifo, i stat long taem we God i mekem wol ya.” (Mat. 24:21) Trabol ya bambae i kasem bigfala mak blong hem long Amagedon. (Rev. 16:16) Long bigfala namba blong ol man we bambae oli ded sipos oli no lesin long gud nius i gat ol famle blong yumi, ol man we oli stap raonabaot long yumi, ol man we oli wok wetem yumi, ol fren blong yumi long skul, mo ol gudfala fren blong yumi. Be samting we i impoten long yumi hemia blong kasem “olgeta man,” sem mak olsem God we i soem lav blong hem long olgeta man long wol taem hem i givim Pikinini blong hem, Jisas Kraes, olsem wan ransom blong olgeta. (Jon 3:16) Wetem strong tingting, yumi mas traehad blong singaotem olgeta man blong oli ronwe i go long God blong kasem sef. Sipos yumi gohed fulwan blong mekem wok blong prij, bambae yumi no gat kaon from blad blong narafala man.—Esik. 33:1-7; 1 Kor. 9:16.
3 ?Wanem Nao Mak Blong Yumi? Fulwan tok blong God i soemaot se wok blong prij hem i impoten. Aposol Pol i talem se “from we Kraes i lavem mifala tumas, nao fasin ya blong hem i stap holemtaet mifala” mekem se laef blong mifala i laenap wetem ol fasin blong God. (2 Kor. 5:14) Mo tu, oltaem Wajtaoa i soemaot klia se wok blong prij hem i wan samting we yumi mas mekem. Kingdom Wok Blong Yumi i gohed blong soem olsem wanem blong mekem wok blong prij. Ol elda oli lukaot se wok i gohed mo oli leftemap tingting blong yumi blong joen long wok ya. Ol narafala pablisa oli askem yumi blong joen wetem olgeta long wok blong prij. Oltaem yumi harem advaes blong rere gud ol fastok blong seremaot magasin mo ol narafala buk, mekem ol visit bakegen, mekem ol Baebol stadi, mo yusum gud evri janis blong prij long ol man. Olgeta samting ya oli halpem yumi blong kasem mak blong yumi hemia blong sevem laef.—1 Kor. 9:22, 23; Efes. 1:13.