?Bambae Yu Talem Wanem Long Mesin We i Ansarem Telefon?

Telefon hem i wan nambawan rod blong prij long ol man we yumi no save faenem long haos, no long ol man we oli laef long ol teritori farawe. Be, plante moa man naoia oli no moa stap ansa long telefon​—⁠oli letem wan mesin i toktok long ples blong olgeta. ?Taem samting olsem i hapen, yu save mekem wanem? I nogud yu putum daon telefon. Maet yu save rerem wan smol tok we yu raetem long wan pis pepa fastaem, nao yu save ridimaot tok ya long telefon. Maet i gud we fastaem yu talem tok ya long yu wan bakegen, blong mekem se voes blong yu i stret mo i kaengud taem man bambae i harem. ?Wanem samting we yu save talem?

Ating yu save singaot man no woman ya blong kam lesin long nekis Pablik Tok we bambae i stap long Haos Kingdom blong yu. Maet yu talem se: “Mi sore se mi no faenem yu long haos. Sipos yu wantem lesin long wan tok we i stanap long Baebol, long saed blong [talem stamba tok blong pablik tok ya], plis kam long Haos Kingdom blong ol Witnes blong Jeova. Olgeta man long pablik oli save kam lesin. Mifala i no mekem kleksen.” Nao yu save talem klia, wanem dei mo taem blong miting ya, mo givim stret adres no eksplenem ples we Haos Kingdom i stap long hem.

Nao taem yu go long ol miting yu mas lukluk sipos i gat sam niuwan we oli kam, ale yu save go sekhan long olgeta, mo welkamem gud olgeta. !No fogetem blong askem olgeta sipos oli wantem gat wan fri Baebol stadi long haos blong olgeta!