Program Blong Nekiswan Seket Asembli
Tok ya fraet i save minim, “bigfala respek mo ona, speseli long God.” Hemia nao mining blong gudfala fraet we Baebol i talem se man i mas gat sipos hem i “wantem kam waes.” (Sam 111:10) Be wan defren kaen fraet i stap long wol ya we Setan i bos long hem. ?Olsem wanem yumi save blokem nogud fraet ya, mo long semtaem wokem wan gudfala fasin fraet long Jeova? Program blong seket asembli long sevis yia 2002 bambae i tokbaot kwestin ya. Stamba tok blong asembli ya hemia: “Fraetgud Long God Mo Givim Ona Long Hem.” (Rev. 14:7, NW ) Bambae yumi kasem save long plante blesing we fasin fraetgud long Jeova i stap karem i kam long yumi wanwan mo long kampani blong ol man blong hem.
I tru se, tok ya fraetgud i save karem mining se wari tumas, lusum strong tingting, mo no wantem fesem ol traem. Be Baebol i talem se: “Ol man we oli stap fraet long Jeova, . . . oli save harem gud.” (Sam 128:1, NW ) Long program blong asembli ya bambae i soemaot long yumi olsem wanem yumi save winim ol problem we yumi fesem long saed blong trufala wosip. Bambae yumi luk olsem wanem blong givhan long ol niuwan blong wokem gudfala fasin ya blong fraet long God, we bambae i pusum olgeta blong wantem mekem wok blong hem wetem ful hat, laef, tingting mo paoa blong olgeta. (Mak 12:30) Faswan dei blong asembli ya bambae i finis wetem wan tok we distrik elda bambae i mekem, stamba blong hem se: “Kam Klosap Moa Long Olgeta We Yu Laekem Olgeta Tumas.” Bambae hem i eksplenem olsem wanem yumi save wekapgud long ol traehad blong Devel Setan blong pulum yumi blong lego Jeova, famle blong yumi, mo ol Kristin brata.
Long seken dei blong asembli, bambae i gat wan tok we i gat fo haf blong hem, nem blong tok ya se: “Fraetgud Long Jeova, i No Long Ol Man.” Bambae tok ya i eksplenem olsem wanem mo from wanem yumi mas winim enikaen fasin fraet we i save blokem yumi blong mekem minista wok blong yumi, no blong stap tru long God, no blong holem wan tingting we i no jajem yumi, hemia long skul mo long ples blong wok. Pablik tok ya, “Fraetgud Long God Mo Folem Ol Loa Blong Hem” i stanap long ol samting we Revelesen japta 14 i tokbaot. Bambae seket asembli i finis wetem gudfala advaes ya blong “Gohed Blong Wokbaot Wetem Fasin Fraetgud Long Jeova.”
Tiokratik Skul, Miting Blong Kingdom Wok, tok long saed blong baptaes, mo tok we i stanap long Wajtaoa oli ol narafala haf blong program we bambae yu no mas mestem. Singaot ol Baebol studen blong yu blong oli kam long asembli ya. Eniwan we i wantem baptaes i mas talem long presiden elda kwiktaem. !Yumi evriwan i wantem soemaot we yumi fraetgud long Jeova mo leftemap nem blong hem taem yumi no mestem wan haf long nambawan program ya!