Program Blong Nyufala Seket Asembli
“Holemgud Ol Loa Blong God mo Stap Laef.” Hemia stampa tok blong seket asembli blong tu dei we bambae i stat long manis Septemba. (Prov. 4:4) Bambae asembli ya i soemaot gud from wanem fasin obei long ol loa blong God i no hevi tumas. Mo tu, bambae hem i soem olsem wanem fasin blong mekem wil blong God i save mekem se yumi haremgud, mo i save karem trufala glad mo hop long fyuja tu.—Matyu 11:28-30; Jon 13:17.
Olgeta we, folem oda blong Kraes, oli wantem tekem baptaes long asembli ya, oli mas toktok wetem presiden elda, mo bambae hem i talem long olgeta ol samting we oli mas mekem.—Matyu 28:19, 20.
Bambae wan tok we i gat defren haf long hem i eksplenem sam nambawan rod blong soem se yumi laekem God mo ol brata blong yumi. (Jon 13:34, 35; 1 Jon 5:3) Program ya bambae i tokbaot sam advaes we oli tajem hat, we oli kamaot long Ol Sam 19 mo 119. Nating se i gat plante taosen yia finis we speret blong God i pusum man blong raetem ol advaes ya we oli stap long Ol Sam, bambae yumi luk olsem wanem oli save givhan long yumi wanwan tede.
Stampa tok blong pablik tok we Distrik elda bambae i givim, hem i: “Fraet Gud Long God mo Folem ol Loa blong Hem.” (Ekl. 12:13) Laswan tok blong Seket elda bambae i soem olsem wanem ol yangfala oli save gat wan nambawan laef naoia mo from wanem oli save gat tras long wan fyuja we i no save finis. Distrik elda bambae i finisim program ya taem hem i tokbaot olgeta nambawan samting we oli kamaot taem yumi folem “loa we i stampa blong ol narafala loa,” hemia loa blong lav. (Jem. 2:8) !Yes, bambae i no gat wan we i wantem mestem asembli ya!