Program Blong Nekis Seket Asembli
1 Stampa tok blong ol seket asembli we oli kamaot biaen long Septemba se, “Lesin Mo Lanem Blong Obei Long Tok Blong God.” Stampa tok ya, we i stanap long Dutronome 31:12, 13, i stret nomo long ful program, we i tokbaot ol samting we yumi nidim blong lanem mo folem.
2 Nating se tede bighaf blong ol man oli lesin long ol gyaman toktok blong ol rabis speret, i gat bigfala nid blong yumi evriwan i lesin long Tok blong God mo lanem blong obei long hem. (Luk 11:28; 1 Tim. 4:1) Oli tingbaot samting ya taem oli wokem program blong seket asembli ya, taswe hem i blong leftemap tingting mo halpem olgeta pablisa, famle, elda, mo paenia. Long Sarede, bambae i gat wan tok we i gat fo haf blong hem, nem blong hem se, “Lesin Long Tok Blong God Blong Stanap Strong Tru Long Ol Trabol Blong Yumi.” Mo long Sande moning, i gat wan tok we i gat ol defren haf blong hem se, “?Olsem Wanem Baebol i Save Stretem Yumi Folem Stret Fasin?” Long ful program, bambae i gat ol tok we oli leftemap tingting long saed blong speret, taswe yu mo famle blong yu i no mas mestem.
3 Long Sarede mo long Sande, bambae i gat ol tok mo pleplei, blong givim ol advaes we i rili wokgud long wok blong prij. Bambae i gat ol ekspiryens, mo oli askem sam kwestin long samfala tu. Ol samting ya oli save leftemap tingting mo tijim yumi. Taswe, sipos yu stap mo yu lesin wetem wan tingting blong folem ol samting we yu lanem, bambae yu save moa olsem wanem blong obei fulwan long ol oda long Tok blong God.
4 Wan impoten haf blong seket asembli, hemia baptaes blong ol nyufala brata mo sista we oli jes givim laef blong olgeta i go long Jeova. Longtaem bifo we oli baptaes blong soemaot samting ya, oli mas talemaot long presiden elda se oli wantem baptaes, blong hem i save mekem wan plan blong oli mekem miting wetem ol elda.
5 Pablik tok blong seket asembli ya hemia, “?From Wanem Yumi Mas Letem Baebol i Lidim Yumi?” Singaot ol man we oli intres blong oli kam. Blong kasem ol tok ya blong leftemap tingting mo ol help ya we yu mo famle blong yu i nidim, mekem plan naoia blong stap long ful asembli.