Nyufala Program Blong Seket Asembli
1 Stampa tok we bambae oli tokbaot long nyufala program blong seket asembli we bambae i stat long Septemba, se “Yufala i Mas Wekapgud Long Tingting, Stanap Strong, mo Kasem Bigfala Paoa.” Hem i stanap long tok blong aposol Pol blong leftemap tingting blong ol Kristin long faswan handred yia, we i stap long 1 Korin 16: 13.
2 Program ya bambae i stat wetem ol toktok blong soemaot se yumi wanwan i nidim oltaem blong skelem yumi long saed blong speret. Blong holemstrong long wanem we i stret long ol ‘lasdei ya,’ i nidim we yumi no gyaman long yumi wan, taem yumi skelem fasin fren blong yumi wetem Jeova mo fasin blong yumi blong gohedgud wetem ogenaesesen blong Hem long wol. (2 Tim. 3:1) Bambae i gat toktok blong mekem yumi tingbaot fasin tangkyu blong Jeova long ol hadwok we yumi stap mekem. Yumi nidim blong kasem advaes long saed blong ol rod blong kamgud moa long ol Kristin fasin blong yumi mo blong gohed blong soem gud eksampel long fasin blong yumi.
3 Bambae oli makemgud tu, nid blong wok strong wetem glad long wok blong mekem disaepol, taem yumi traehad blong gru long saed blong speret mo kasem ol responsabiliti. Long plante defren tok, pleplei, mo storeyan, bambae oli tokbaot ol advaes we oli save wokgud, blong mekem se ol wanwan man mo ol famle oli save holemtaet wan program blong kakae long saed blong speret oltaem.
4 Long Sarede, olgeta we oli kasem mak, bambae oli save soemaot se oli givim laef blong olgeta long God taem oli tekem baptaes long wora. Afta, long Sande, bambae yumi evriwan i wantem stap blong lesin long pablik tok we stampa blong hem se, “?Yu Yu Stap Stanap Olsem Wanem Long Fes Blong God?”
5 Program bambae i finis wetem ol tok blong leftemap tingting blong gohed blong holem strong bilif, mo blong oltaem mekem ol samting long narafala long fasin blong lav mo pis. Seket asembli i wan long ol spesel jans we Jeova i givim long yumi evriwan blong ‘givgivhan long yumi blong soem lav mo blong mekem ol gudfala wok we i stap.’ (Hib. 10:24, 25) Mekem plan naoia blong bambae yu stap long ful program blong tufala dei ya.