Seket Asembli i Halpem Yumi Blong Lukaotgud Blong Stap Strong Long Saed Blong Spirit
1. ?Wanem wan samting we Jeova i givim blong halpem yumi blong mekem wok blong talemaot gud nius?
1 Jeova i gat gladhat blong givim fulap save, trening, mo tok we yumi nidim, blong pulum yumi blong joen long wok blong talemaot gud nius we hem i putum long han blong yumi. (Mat. 24:14; 2 Tim. 4:17) Seket asembli evri yia i wan rod blong kasem ol samting ya. Program blong seket asembli blong seves yia 2010 bambae i karem stamba tok ya “Lukaotgud Blong Stap Strong Long Saed Blong Spirit,” we i stanap long Rom 8:5 mo Jud 17-19. Seket asembli ya bambae i stat long sam ples long wik blong Ogis 31, 2009.
2. (a) ?Olsem wanem seket asembli ya bambae i halpem yumi? (b) ?Olsem wanem ol seket asembli we oli pas finis oli halpem yu long wok blong prij?
2 ?Bambae Hem i Halpem Yumi Olsem Wanem?: Ol tok bambae oli wekemap tingting blong yumi, blong luksave sam denja, olsem ol pleplei we oli save kakae taem blong yumi, mo pulum tingting blong yumi i gowe long ol impoten samting. Bambae yumi lanem olsem wanem yumi save blokem nogud tingting ya se yumi fri blong mekem eni samting. Mo yumi luk wanem ya ol prapa fasin blong man we i laekem ol samting blong spirit. Long taem blong yumi, yumi stap kasem plante moa trabol, mo plante traem we oli save spolem bilif blong yumi. Taswe, tok blong Sande we i gat plante haf blong hem, i tokbaot ol aksen we ol man wanwan mo ol famle oli save tekem blong agensem ol fasin ya, mo blong kam strong moa long spirit. Olgeta tok bambae oli halpem yumi blong lukaotgud long hat blong yumi, blong holem ol gudfala fasin long spirit, mo blong tingbaot ol bigfala blesing we God i givim long ol man we oli laekem ol samting blong spirit.
3. ?Wanem stret taem blong nekis seket asembli blong yufala? ?Yu mas gat strong tingting blong mekem wanem?
3 Taem yufala i save stret taem mo ples we bambae yufala i mekem nekiswan seket asembli, mekem plan blong yu blong stap long tufala dei blong asembli ya, mo lesingud long olgeta haf blong program ya. Yu save sua se Jeova bambae i blesem man we i wok strong blong mekem wan gudfala plan olsem i kamtru.—Prov. 21:5.
4. ?Bambae yumi sua blong kasem wanem long nekis seket asembli?
4 Tru ya, Jeova nao i givim gudfala presen ya long yumi. Program we grup ya we i olsem slef we i stret i mekemrere, hemia stret samting we yumi ol Kristin yumi nidim blong gohed olsem ol man blong wok blong God. Yumi talem tangkiu long Jeova from olgeta samting we hem i givim wetem lav, blong halpem yumi blong ‘holemtaet fasin ya we yumi talemaot finis se i fasin blong yumi, [hemia] we yumi putum tingting blong yumi i stap strong long God, se hem bambae i mekem ol promes blong hem i kamtru.’—Hib. 10:23-25; Jem. 1:17.