Yumi Wekap Nomo Mo Yumi Lukaotgud Long Ol Samting We Yumi Mekem
1 Wol i stap jenis, taswe i stret nomo se stampa tok blong ol seket asembli blong yia 1991 i se: “Yumi wekap nomo mo yumi lukaotgud long ol samting we yumi mekem.” (1 Tes. 5:6, NW) Ol asembli ya bambae oli stat long manis Septemba. Seket elda bambae i talem long yumi wetaem yumi gat asembli, ale biaen, yumi wanwan i mas rere gud blong stap long taem blong asembli.
2 Bambae 4 brata oli mekem wan impoten tok we i gat defren haf long hem. Tok ya bambae i givhan long yumi blong yumi “lukaot gud blong tekem stret rod.” (2 Tim. 4:5) ?Nating se bifo yumi mekem sam mastik, be olsem wanem yumi save ronwe long olgeta trap blong Setan naoia? ?Olsem wanem blong agensem speret blong wol? Yufala i no mas mestem gudfala tok ya. Long tufala dei blong asembli, bambae yumi save tokbaot bakegen ol nambawan advaes blong buk Young People Ask— Answers that work. I gud sipos yufala i karem buk blong yufala i kam long asembli. Long Sarede, ol yangfala oli mas lesingud long ol samting we seket elda bambae i talem long olgeta. Olsem oltaem, bambae i gat tok blong baptaes long Sarede. Olgeta we oli wantem soemaot long ol narafala se oli givim laef blong olgeta long God oli mas kwik blong go luk presiden elda.
3 Long Sande moning, bambae i gat plante pleiplei lelebet mo yumi gat jans blong kasem fulap gudfala advaes. Mo tu, ol pleplei ya bambae oli soemaot se sipos yumi gat trabol no yumi mekem sam mastik, i gat rod blong lanem sam samting from. Long aftanun, distrik elda bambae i givim tok ya se, “Yumi wokbaot long waes fasin long wan wol we i krangke.” Ol pablisa mo ol man we oli intres long trutok oli mas traehad blong stap long taem ya.
4 Laef i kam strong moa tede, taswe mifala i ting se ol tok ya we mifala i mekem rere bambae oli leftemap tingting blong yumi mo oli save halpem yumi evriwan. Mo tu, bambae oli mekem yumi harem gud bakegen long saed blong speret. Bambae yumi kasem save long plante narafala rod we oli save givhan long yumi blong yumi lukaotgud long ol nid blong yumi mo famle blong yumi long saed blong speret. Yes, yumi mas gat strong tingting blong stap long evri haf long seket asembli mo yumi mas lesingud ‘from we yumi save taem we yumi stap long hem naoia. Hemia i taem blong yumi i wekap, yumi no moa slip bakegen. Fastaem, long taem we yumi jes bilif long Kraes nomo, taem ya we bambae hem i sevem yumi i stap longwe yet long yumi. Be naoia taem ya i stap kam kolosap.’—Rom. 13:11.