Yumi Wanwan i Mas Karem Responsabiliti Blong Yumi
1 Tede, mining blong wod ya ‘responsabiliti’ i mekem tingting blong plante man i hevi. Oli no wantem karem responsabiliti. From samting ya, sam hasban oli lego waef blong olgeta, sam mama oli livim pikinini blong olgeta, sam yangfala oli ronwe long skul, mo sam man oli no wantem pem takis. I gat fulap samting moa we ol man oli mekem from we oli no wantem karem responsabiliti blong ol. Wan man we hem i rere blong karem responsabiliti blong hem, ol man oli save trastem hem. Hem i rere mo hem i naf blong karem frut blong ol fasin blong hem. Taswe Tok blong God i talemaot klia se evri Kristin man “i gat basket blong hem blong karem.” (Gal. 6:5) Taswe i stret nomo we stampa tok blong seket asembli long tiokratik yia 1992, i olsem: “Yumi Wanwan i Mas Karem Responsabiliti Blong Yumi.” Ol asembli ya bambae oli stat long Septemba. Yumi evriwan i mas mekem plan blong kam long asembli ya, taem oli mekem long ples blong yumi.
2 Gudfala program blong asembli bambae i soemaot klia ol responsabiliti blong yumi ol Kristin man. Blong mekem olsem, bambae i gat ol tok, pleplei, ekspiryens, mo samfala oli ansa long sam kwestin. Long Sarede aftenun, i gat wan tok we i gat fo haf blong hem. Hem i eksplenem olsem wanem yumi save karem ol responsabiliti blong yumi wetem fasin glad. Ol yangfala oli mas karem sam responsabiliti tu. Tok blong seket elda long Sarede aftenun bambae i go stret long olgeta. Long Sarede, olgeta we oli jes givim laef blong ol i go long Jeova, oli save tekem baptaes. Olgeta we oli mekem plan blong baptaes long nekis seket asembli oli mas talemaot long presiden elda kwiktaem, blong ol elda oli save mekem olgeta i rere.
3 Long Sande moning i gat wan tok we i gat fo haf blong hem. Bambae hem i tokbaot responsabiliti blong ol Kristin blong prij. Long Sande aftenun, distrik elda bambae i givim pablik tok, nem blong hem: “Nyufala Wol Blong God—?Bambae Hu i Naf Blong Go Insaed Long Hem?” Yumi mas tekem evri jans blong singaot ol man we oli intres blong kam lesin long tok ya.
4 Yumi evriwan i mas mekem plan blong kam long asembli ya, mo blong lesin gud long nambawan program blong tufala dei blong hem. Bambae seket elda blong yufala i talem ples mo stret dei blong asembli long kongregesen blong yufala.