Niufala Program Blong Seket Asembli

?Wanem blesing yu save kasem naoia taem yu stap wokbaot wetem Jeova? ?Olsem wanem yu save blokem tingting ya we i stap pulum yu blong putum ol wok blong bodi fastaem long ol wok blong Kingdom? (Mat. 6:​33) Wol ya i twistim ol nogud samting blong mekem olsem se oli gud. From samting ya, ?yu faenem se i had blong luksave wanem samting i gud mo wanem samting i nogud? (Hib. 5:​14) Ol seket asembli we bambae oli stat long Septemba 1999, bambae oli tokbaot ol kwestin ya. Stamba tok blong hem se: “Kasem Blesing Naoia Taem Yu Wokbaot Long Rod Blong Jeova.”​—Sam 128:1.

Wan niufala samting we bambae i kamaot long Sarede blong seket asembli ya, hemia wan tok blong soemaot olsem wanem blong mekem Miting Blong Kingdom Wok. Bambae seket elda i talemaot long ol kongregesen wanem plan blong folem blong mekem se evri wan i save rere mo haremgud from ful program ya.

Tok ya “Ol Paenia​—Lukaotgud Oltaem Long Fasin Blong Yufala,” bambae i soemaot long yumi olsem wanem blong yusum waes fasin mo fasin blong skelemgud ol samting blong pemaot taem long wok blong paenia. (Efes. 5:​15-​17) Tok ya “Lukaot Long Ol Rod We i Luk Olsem Stret Rod,” bambae i tijim yumi blong save olsem wanem yumi save sua long ol samting we God i akseptem long evri haf long laef blong yumi. Tok ya, “Olsem Wanem Profet Tok We i Kamtru Finis i Gat Paoa Long Yumi,” bambae i pulum tingting mo hat blong yumi blong laekem tumas Tok blong God. Pablik tok ya se, “Ol Rod Blong God​—!Oli Gud Tumas!” bambae i makem ol nambawan blesing we yumi stap kasem naoia sipos yumi folem ol stret loa blong Jeova oltaem.

?Yu yu wantem soemaot long ol narafala man tru long baptaes long wota se, yu glad blong wokbaot long ol rod blong God olsem man blong hem? Sipos yes, yu save toktok wetem presiden elda blong mekem ol plan blong baptaes blong yu.

Traem bes blong yu blong no mestem seket asembli ya. Kam long ful program blong tufala dei, from we ‘ol man we oli stap folem ol tok we God i putum, bambae oli save harem gud.’​—Sam 128:1.