Ol Blesing We Yumi Kasem Taem Yumi Soem Tangkiu From Lav Blong Jeova—Haf 1
1 Aposol Jon i raetem se: “Yumi stap lavem God mo ol narafala man, from we God i lavem yumi fastaem.” (1 Jon 4:19) Taem yumi tingting long olgeta samting we Jeova i givim long yumi, hemia i pusum yumi blong yumi soem bigfala tangkiu long hem. Jisas i soemaot eksampol long saed ya taem hem i obei nao i talemaot nem mo Kingdom blong God. (Jon 14:31) I gud sipos yumi lukluk long sam rod we yumi save soemaot tangkiu from lav blong Jeova mo ol blesing we hem i givim.
2 Go Long Ol Haos Wanwan: Jisas i tijim ol disaepol blong hem olsem wanem blong talemaot Kingdom. Ol oda we hem i givim oli soemaot klia se oli go long ol haos wanwan blong talemaot gud nius. (Luk 9:1-6; 10:1-7) Yumi mas lavem God mo ol man raonabaot long yumi, blong yumi save gohed blong go long ol haos wanwan, nating sipos ol man oli no soem intres mo oli agens. Sipos yumi gohed blong mekem olsem, yumi tu yumi save kasem gudfala frut, from we bilif mo tingting blong yumi oli kam moa strong, mo gudfala fiuja we yumi save gat bambae i kam klia moa.
3 Taem yumi mekem wok ya we ol enjel oli lidim, yumi faenem plante we oli hanggri mo tosta from trutok. (Rev. 14:6) Sam man oli bin talem se taem oli stap prea blong askem God blong i givhan long olgeta, ale long stret taem ya wan Witnes i kam long haos blong olgeta. Tu Witnes mo wan smol pikinini oli stap prij long ol haos wanwan long wan aelan blong Karibin. Nao tufala sista ya oli wantem stop, be smol pikinini ya i go hem wan long nekis haos mo i noknok long doa. Nao wan yangfala woman i openem doa. Taem tufala sista i luk samting ya, tufala i go toktok long woman ya. !Yangfala woman ya i singaot olgeta oli go insaed long haos mo i talemaot se hem i jes finis nomo blong prea long God blong Hem i sanem ol Witnes oli kam blong tijim hem long Baebol!
4 Prij Long Ol Rod: Long sam ples i hadwok blong faenem ol man long haos blong olgeta, taswe, yumi gat janis blong prij long olgeta taem yumi prij long rod. Mo tu, plante man oli laef long ol haos no ples we oli lokem gud get blong hem, blong man i no save go insaed, mekem se yumi no save go prij long ol haos ya. Be tangkiu we yumi gat from lav blong Jeova i pusum yumi blong yusum evri janis blong kasem ol man wetem mesej blong Kingdom, janis ya tu we yumi gat blong prij long ol rod.—Prov. 1:20, 21.
5 Mekem Visit Bakegen: Yumi stap lukaotem olgeta we oli “nidim ol samting long saed blong spirit,” taswe yumi wantem mekem olgeta samting we yumi naf blong mekem blong fulumap nid ya. (Mat. 5:3, NW ) Blong mekem olsem, yumi mas gobak blong putum wota long ol sid blong trutok we yumi bin planem. (1 Kor. 3:6-8) Wan sista long Ostrelia i bin givimaot wan traket long wan woman we i luk olsem se i no intres tumas. Nating se i olsem, sista ya i gobak plante taem blong traem faenem woman ya bakegen. Taem sista blong yumi i faenem hem, woman ya i talem se afta we tufala i bin toktok fastaem, hem i go pem wan Baebol we praes blong hem i antap olgeta. !Nao sista ya i statem stadi wetem woman ya!
6 Lidim Ol Baebol Stadi: Hemia haf blong minista wok blong yumi we i save givim moa glad mo karem moa frut. !I wan bigfala blesing blong givhan long ol man blong oli save Jeova, mo blong luk we oli jenisim ol samting long laef blong olgeta blong mekem Jeova i glad, nao oli tekem baptaes olsem saen we oli givim laef blong olgeta i go long God!—1 Tes. 2:20; 3 Jon 4.
7 Nekis taem, bambae yumi lukluk sam moa rod we yumi save kasem blesing long hem taem yumi soem tangkiu from lav blong Jeova.