Tijim Tok Blong God Long Fasin We i Stretgud
1 Taem Filip i prij long wan haeman, hem i “stat stret long tok ya blong Baebol we man ya i stap ridim, i talemaot gud nius blong Jisas long hem.” (Wok 8:35) Filip i stap “tijim ol man long trutok blong God long fasin we i stret gud.” (2 Tim. 2:15) Be, long taem blong yumi, sam elda we oli goraon blong visitim ol kongregesen, oli luk se plante pablisa oli no yusum Baebol taem oli prij. ?Yu yu stap yusum Baebol long wok blong prij?
2 Tok blong God i stamba blong evri samting we yumi bilivim mo tijim. (2 Tim. 3:16, 17) Hemia samting we i pulum ol man oli kam long Jeova mo i tijim olgeta blong oli kam naf blong kasem laef. Taswe i impoten we yumi yusum Baebol long wok blong prij, i bitim we yumi tokbaot ol samting we yumi nomo i laekem blong tokbaot. (Hib. 4:12) From we bighaf blong ol man oli no gat save blong Baebol, yumi mas ridim sam tok blong Baebol long olgeta blong soem ol gudfala advaes we i stap insaed, mo nambawan fiuja we ol man oli save gat.
3 Ridim Tok Stret Long Baebol: Maet yu traem blong no karem wan bigfala basket taem yu go long ol haos. Yu save putum buk we yu wantem soem long wan smol basket nomo mo karem Baebol long han blong yu. Ale, taem yu stap stori long wan man, yu save tekemaot Baebol long wan fasin we i no mekem man i harem olsem se yu stap mekem wan jos sevis long fored blong hem. Stanap long wan ples we man blong haos i save lukluk mo folem tok we yu ridim long Baebol. Maet yu save askem hem tu blong ridimaot wan vas. Bambae tok blong God i gat moa paoa long man sipos hem i luk wanem we Baebol i talem, bitim we hem i harem yu yu talem nomo. Blong halpem man blong kasem save mining blong vas ya, i impoten blong makem gud ol stamba poen long vas.
4 Yusum Wan Vas: Afta we yu talemaot nem blong yu, maet yu talem olsem: “Ol man oli lukluk long ol defren ples blong faenem save blong lidim olgeta long laef. ?Yu ting se wanem nao i beswan stamba blong ol gudfala advaes? [Letem man i ansa.] ?Yu ting wanem long saed blong toktok ya? [Ridim Ol Proveb 2:6, 7, mo letem man i ansa.] Sore tumas, yumi luk we waes blong man i no naf nating, mo i bin lidim plante man blong harem nogud. Be, olgeta we oli bin trastem waes blong God, oli luk se i givhan gud mo i stret oltaem.” Nao soem buk we yu wantem seremaot, mo ridim wan haf long hem we i tokbaot waes blong God.
5 Jisas i bin yusum Tok blong God blong givhan long olgeta we hat blong olgeta i stret. (Luk 24:32) Pol i bin yusum Baebol blong pruvum ol samting we hem i tijim. (Wok 17:2, 3) Bambae yumi no fraet mo bambae yumi glad moa long wok blong prij sipos yumi stap kam moagud blong tijim ol man long trutok blong God long fasin we i stret gud.