!Wok Blong Talemaot Kingdom i Givhan Blong Sevem Laef Blong Ol Man!

¹ Wok ya i moa impoten i bitim ol narafala wok long wol tede. Jeova God, Jisas Kraes, mo ol milian enjel oli stap lukluk wok ya. ?Wanem wok ya, mo from wanem i nidim wok ya? !Hemia wok blong talemaot Kingdom, mo wok ya i givhan blong sevem laef blong ol man!—Rom 1:16; 10:13, 14.

² Samfala man oli gat tingting se yumi givhan moa long ol narafala sipos yumi traem blong mekem wol blong yumi i kam moa gud. Plante oli bisi tumas blong traem karem pis i kam, finisim ol sik mo mekem trabol long saed blong mane i kam gud. ?Be wanem samting bambae i givhan moa long ol man?

³ Wan Nambawan Wok: Ol tok long saed blong Kingdom nomo i eksplenem from wanem yumi laef, from wanem ol man oli stap harem nogud, mo promes long saed blong fiuja we yumi save trastem. Gud nius i mekem se ol man oli save kam fren blong Jeova, nao oli save kasem “pis we hem i givim, we i bigfala moa, i bitim save blong yumi.” (Fil. 4:7) Ol tok long saed blong Kingdom nomo i lidim mo halpem gud ol man blong oli winim ol trabol blong laef tede, mo hem i eksplenem olsem wanem oli save stap laef taem bambae rabis wol ya i lus. (1 Jon 2:17) Yes, i stret we yumi talemaot Kingdom wetem olgeta paoa blong yumi.

⁴ Wan pijatok: Ol man blong wan vilej oli stap slip. Be bigfala stonwol we i blokem wota blong olgeta i rere blong bosta. ?Wanem beswan rod blong givhan long ol man ya? ?Bambae yu karem wan baket, yu traem belaot biaen long bigfala stonwol ya we i rere blong brok? ?Bambae yu flasem vilej ya we i stap long denja? !Nogat! !Ol man long vilej ya oli mas wekap, oli mas kasem woning long saed blong denja ya, mo oli mas kasem help blong ronwe long ples ya! Long sem fasin, olgeta we oli stap slip long saed blong spirit tede oli stap long bigfala denja. (Luk 21:34-36) !From we rabis fasin blong wol ya klosap bambae i lus, yumi mas traehad blong prij long olgeta man wetem tingting ya se taem i sot tumas!—2 Tim. 4:2; 2 Pita 3:11, 12.

⁵ Gohed Long Wok Ya: Yumi mas lukaot ol rod blong talemaot gud nius long plante moa man we hat blong olgeta i stret—long haos blong olgeta, long rod, long telefon, mo taem yumi tekem janis blong prij. Wok ya we Jeova i givim long yumi blong mekem, i moa impoten i bitim ol narafala wok. Sipos yumi gat strong tingting blong mekem wok ya, bambae yumi ‘sevem yumi, wetem ol man we oli stap lesin long yumi.’—1 Tim. 4:⁠16.