!Prij Wetem Tingting Ya Se Taem i Sot!
1. ?Wanem tok blong Pol we yumi mas tingtinggud long hem long taem blong yumi?
1 ‘Yu yu mas strong blong talemaot tok blong God’ wetem tingting ya se taem i sot.’ (2 Tim. 4:2) ?From wanem tok ya blong Pol i impoten tumas long taem blong yumi? ?Olsem wanem tok ya i save gat paoa long laef blong yumi mo laef blong ol narafala man?
2. ?From wanem yumi wok strong blong faenem olgeta we oli no harem gud nius yet?
2 Laef Blong Ol Man i Stap Long Denja: I gat plante milian man long wol yet we oli mas harem gud nius ya we i save sevem laef blong olgeta. (Rom 10:13-15; 1 Tim. 4:16) Yumi faenem plante man we hat blong olgeta i stret, long ol teritori we yumi prij oltaem long olgeta. Sipos yumi jenisim taem no dei blong yumi blong go long haos blong ol man, maet yumi faenem ol defren man we yumi no luk olgeta bifo. Taem yumi wok strong olsem blong faenem ol man, bambae tingting blong yumi i no stikim yumi, mo bambae yumi no gat fol long fes blong God from laef blong olgeta.—Wok 20:26.
3. ?Long wok blong prij, olsem wanem yumi save yusum taem blong yumi long waes fasin?
3 Nating se ol faswan Kristin oli fesem strong fasin agens, be oli mekem se ‘Jerusalem i fulap long ol tok blong olgeta.’ (Wok 5:28) ?Olsem wanem long yumi? ?Yumi tu yumi gat strong tingting blong ‘talemaot gud nius fulwan’? (Wok 10:42, NW) ?Taem yumi stap long wok blong prij, yumi yusum taem blong yumi long waes fasin? Sipos sam pablisa oli stap mekem visit mo yumi mas wet long olgeta, ?yumi tekem janis blong toktok long ol man we oli stap pas long rod?
4. ?Taem yumi prij wetem tingting ya se taem i sot, olsem wanem samting ya i halpem yumi blong lukaot gud oltaem?
4 Wok Ya i Mekem We Yumi Stap Wekap: En blong rabis fasin blong wol ya i klosap tumas, taswe yumi mas stap wekap, yumi mas lukaot gud. (1 Tes. 5:1-6) Sipos yumi tokbaot oltaem gudfala fiuja we Kingdom bambae i mekem i kamtru, yumi stap blokem ol wari blong wol ya blong oli no kam hevi tumas long yumi. (Luk 21:34-36) Mo tu, sipos yumi “tingtinggud” oltaem long dei blong Jeova, samting ya bambae i pulum yumi blong wok strong moa long wok blong prij, blong sevem laef blong ol man.—2 Pita 3:11, 12, NW.
5. ?Olsem wanem respek we yumi gat long saed blong laef, i pusum yumi blong prij?
5 Taem yumi prij wetem tingting ya se taem i sot tumas, yumi stap soemaot tingting blong Jeova long saed blong laef blong ol man: “Hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9; Esik. 33:11) !I gud yumi gat strong tingting blong faenem plante moa man long ol teritori blong yumi, blong yumi evriwan i presem Jeova!—Sam 109:30.