Program Blong Nekiswan Seket Asembli
1 Blong stanap strong long bilif, long wol ya we i stap jenis oltaem, yumi mas trastem Jeova. ?Olsem wanem yumi save soemaot tras ya long laef blong yumi evri dei? ?Sipos yumi trastem Jeova, bambae samting ya i mekem wanem long laef blong yumi wanwan mo long famle laef blong yumi? ?Olsem wanem tras ya bambae i givhan long yumi blong blokem paoa we wol blong Setan i save gat long yumi? Seket asembli long sevis yia 2003 bambae i ansa long ol kwestin ya. Stamba tok blong asembli ya, hemia: “Trastem Jeova Mo Mekem Ol Fasin We i Gud.”—Sam 37:3.
2 Yumi no jes trastem Jeova sam samtaem nomo, maet taem yumi rili nidim hem. Nogat. Yumi mas trastem hem long evri samting we yumi mekem evri dei. Faswan tok blong asembli i makem poen ya, nem blong tok ya: “Trastem Jeova Oltaem.” (Sam 62:8) Mo tu, i gat wan tok we i gat fo haf blong hem, nem blong tok ya: “Soemaot Tras Long Jeova.” Tok ya bambae i soemaot long yumi olsem wanem blong faenem mo folem ol save blong Baebol, blong givhan long yumi blong wokem wan gudfala mared, blong stretem ol trabol we i kamaot insaed long famle, mo blong kasem ol samting we yumi nidim long saed blong bodi.
3 Wol blong Setan i traem blong pulum yumi blong gat rong tingting long saed blong ol samting we i stret mo ol samting we i no stret. Hem i wantem mekem se yumi no moa luksave wanem samting i impoten mo wanem samting i no impoten. (Aes. 5:20) Tok ya “Lukaot Blong No Westem Taem Long Ol Samting We i No Impoten” wetem tok ya “Blokem Ol Samting We i Nogud—Mekem Ol Samting We i Gud,” bambae oli halpem yumi blong holem strong tingting blong folem ol gudgudfala rul blong Jeova.—Amos 5:14.
4 Taem bambae Jeova i spolem rabis wol ya, ol man blong Hem bambae oli nidim blong trastem hem fulwan. Hemia nao bigfala tingting blong pablik tok ya: “I No Longtaem, Bambae Yumi Kam Fri Long Ol Trabol Blong Wol Ya.” Biaen, bambae oli askem long yumi blong tingting gud long kwestin ya: “?Bambae Yu Yu Naf Blong Kasem Laef Aninit Long Kingdom Blong God?” Laswan tok blong asembli i tokbaot: “Trastem Ol Promes Blong Jeova.”
5 Wan spesel samting long evri asembli, hemia tok blong baptaes. Eniwan we i wantem tekem baptaes, i mas talem long presiden elda kwiktaem, blong hem i save mekem ol plan we i mas mekem.
6 Long taem ya we ol samting long wol ya i olbaot, Jeova nomo we yumi save trastem hem mo stanap long hem. (Sam 118:8, 9) I gud yumi evriwan i joen long fulwan seket asembli ya, blong yumi save trastem Jeova moa.