Wok Blong Bildim Ol Niufala Haos Kingdom i Stap Gohed Strong
1 Long Distrik Asembli blong 1983, “Kingdom i Joenem Ol Man,” oli talemaot se i mas gat wan spesel bokis long Haos Kingdom, we yumi save putum presen mane long hem blong sapotem wok blong bildim ol niufala Haos Kingdom long Yunaeted Stet mo Kanada, mo blong mekem sam narafala Haos Kingdom oli kam moagud. Smol samting ya i statem wan bigfala wok we blesing blong hem i bitim samting we yumi bin tingbaot. Yumi luksave fulwan ol tok ya blong Ol Sam 92:4: “Hae God, ol bigfala wok blong yu oli stap mekem mi mi glad tumas. Oltaem mi mi harem gud, mi stap sing from ol samting ya we yu yu mekem.”
2 Mo yumi haremgud tumas blong luk bigfala wok we i stap gohed yet. Wok blong bildim ol Haos Kingdom i spid moa tede. Yumi evriwan i gat janis blong joen long wok ya. Yumi mekem olsem taem yumi givim presen mane blong givhan blong bildim moa haos wosip long olgeta ples blong wol. Mo tu, plante brata oli yusum ol tul blong olgeta, mo oli givim taem, save, mo wok blong olgeta blong givhan blong bildim ol Haos Kingdom. Plan ya i stap gohed gud from we Jeova nomo i lidim, i sapotem, mo i blesem bigwan fasin blong yumi blong joengud wanples blong wok.—Sam 127:1.
3 Plante branj ofis oli folem fasin we ol kongregesen long Yunaeted Stet oli bin yusum fastaem. Long plante kantri, i gat wan bokis i stap long Haos Kingdom nao ol pablisa oli save putum presen mane long hem. Oli makem bokis ya se Presen Mane Blong Ol Haos Kingdom. Long sam narafala kantri, oli putum presen mane long bokis we i stap finis, ale kongregesen i yusum mane ya blong pembak lon we oli bin kasem blong wokem wan Haos Kingdom. Nao Sosaeti i save yusum mane ya we oli givimbak blong wokem ol niufala Haos Kingdom long ol narafala ples. Long Yunaeted Stet, Kingdom Wok blong Maj 1997 i talemaot wan jenis long saed blong plan ya. Hem i se: “Long 1983, yumi stanemap plan ya blong givim Presen Mane Blong Ol Haos Kingdom, mo kam kasem naoia, ol brata mo sista oli givim bigfala mane wetem gladhat. Samting ya i mekem se Sosaeti i save givim lon long plante kongregesen, blong oli bildim Haos Kingdom blong olgeta. Kam kasem naoia, plan ya i givhan long 2,700 kongregesen long Yunaeted Stet. Sipos i no gat plan ya, plante kongregesen oli no save bildim wan niufala Haos Kingdom no mekem olfala haos miting i kamgud moa. Be, naoia i gat bigfala nid blong givim presen mane ya i go olsem lon long ol kongregesen long ol pua kantri. Sosaeti i talem bigfala tangkiu long yufala we i gohed oltaem blong givim smol presen mane. Ol kongregesen we oli kasem wan Haos Kingdom tru long plan ya, olgeta tu oli talem bigfala tangkiu.”
4 Ol tok ya oli singaot evriwan blong joen long plan ya blong wokem moa Haos Kingdom. Stat long taem ya, sam long ol mane long bokis ya Presen Mane Blong Ol Haos Kingdom, i go long ol kongregesen long ol narafala kantri we olgeta tu oli gat nid, mo long semtaem, Sosaeti i yusum sam long ol mane ya blong givim lon from ol niufala Haos Kingdom. Wan narafala Kingdom Wok long Ogis 1997 i talem se: “I gat nid yet blong bildim moa Haos Kingdom long olgeta ples blong wol. Long laswan sevis yia, 3,288 niufala kongregesen oli stanap. Plante long ol kongregesen ya oli stap long Afrika, Esia, Sentrol mo Saot Amerika, mo Is Yurop.”
5 ?Kam kasem naoia, wanem frut i kamaot? Ripot long 2001 Yearbook i talem se: “Plan ya i mekem se oli wokem finis 453 Haos Kingdom long 30 kantri, mo oli stap wokem 727 bakegen naoia. Sosaeti i stap yusum wan stael nomo blong olgeta Haos Kingdom long wan kantri. Olsem nao, oli save yusum ol samting blong bildim haos mo ol fasin blong bildim haos we ol manples long ol kantri ya oli stap yusum. Long Kenia, oli yusum ol ston we oli katem, long Togo oli yusum brikis, long Kamerun, oli wokem haos wetem brikis we biaen oli plastarem. Taem yumi yusum fasin blong ol manples, ol lokol brata oli save lanem kwiktaem blong mekem mo lidim wok ya long kantri blong olgeta.”
6 Ol samting we i kamaot long bigfala kantri ya Afrika i soemaot se Jeova i rili blesem plan ya. !Taem yu luk ol pija ya blong sam Haos Kingdom we oli wokem finis, traem tingbaot olsem wanem plan ya i bin givhan long wok blong ol Witnes blong Jeova! Hem i givhan long tri rod: ol Witnes oli joengud olsem wan brata long fulwol, ol man we oli luk wok ya oli sapraes, mo plante moa man oli kam long ol miting blong kongregesen. Yumi stap tokbaot ol Haos Kingdom long Afrika nomo, be long fiuja, Kingdom Wok Blong Yumi bambae i soemaot olsem wanem plan blong bildim ol Haos Kingdom i stap gohed gud long ol narafala kantri blong wol tu.
[Tok blong pija long pej 3]
Bimbo, Bangui
Ripablik Blong Sentrol Afrika
Begoua, Bangui
[Tok blong pija long pej 4]
Ukonga, Tansania
[Tok blong pija long pej 4]
Accra, Gana
[Tok blong pija long pej 4]
Salala, Laebiria
[Tok blong pija long pej 4, 5]
Allada, Benin—olfala Haos Kingdom
Allada, Benin—niufala Haos Kingdom
[Tok blong pija long pej 4]
Karoi, Simbabwe
[Tok blong pija long pej 5]
Kpeme, Togo
[Tok blong pija long pej 5]
Sokodé, Togo
[Tok blong pija long pej 5]
Fidjrosse, Benin
[Tok blong pija long pej 6]
Lyenga, Sambia—olfala Haos Kingdom
[Tok blong pija long pej 6]
Lyenga, Sambia—niufala Haos Kingdom
[Tok blong pija long pej 6]
Kinshasa, Kongo
[Tok blong pija long pej 6]
Musambira, Ruanda