Bildim Ol Haos Kingdom Long Ol Narafala Kantri
1 I gat nid blong bildim plante moa Haos Kingdom yet long olgeta ples blong wol. Long laswan sevis yia nomo, i gat 3,288 nyufala kongregesen oli stanap. Plante blong olgeta oli stap long Afrika, Esia, Is Yurop, Sentrol mo Saot Amerika.
2 Tri taem, Kingdom Wok Blong Yumi i bin soem sam pija blong ol Haos Kingdom we ol brata oli bildim finis long Afrika, Is Yurop, mo Latin Amerika. Be ol ripot oli soem yet se long wan kantri we i gat 568 kongregesen, i gat jes wan Haos Kingdom nomo. Long wan narafala kantri, i gat wan Haos Kingdom blong evri 129 kongregesen long hem. Long wan narafala kantri bakegen, i gat wan Haos Kingdom blong evri 41 kongregesen. Plante narafala kantri, we tugeta oli gat bitim 1,000 kongregesen, oli no gat wan Haos Kingdom nating. Hemia from we oli pua tumas. I tru se ol brata oli mekem plante wok finis long saed ya, be i gat bigfala nid i stap yet. Mifala i sua se ol kongregesen long Vanuatu oli glad blong givhan long sam kongregesen long ol narafala kantri blong oli gat wan gudfala Haos Kingdom.
3 Hemia i stret long tok blong 2 Korin 8:14, we i talem se: “From we yufala i gat plante samting, i stret blong yufala i givhan long sam narafala man we oli sot.” Plante kantri oli gat ol bokis blong presen mane blong bildim ol Haos Kingdom long kantri blong olgeta, be from we ol brata oli pua, oli no save givim naf mane blong bildim olgeta Haos Kingdom we oli nidim. Be, wetem help blong ol brata blong ol narafala kantri, long 75 kantri mo long 4 manis nomo, Sosaeti i bin givhan blong bildim 413 nyufala Haos Kingdom, mo mekemgud bakegen 727 narafala Haos Kingdom. From we i gat bigfala nid long saed ya, yumi mas yusum sam presen mane we yumi givim long kantri ya blong givhan blong bildim ol Haos Kingdom long ol narafala kantri. I tru se ol presen mane long Vanuatu i stap givhan blong bildim ol Haos Kingdom long kantri ya go kasem mak we yumi nidim, be bambae yumi yusum sam long ol mane ya blong givhan long ol narafala kongregesen tu. Yumi glad tumas blong luk se i gat plante moa Haos Kingdom oli stap stanap long olgeta ples blong wol, blong givim ona long Jeova.—Sam 102:16; Hag. 1:7, 8.