Tijim Narafala Long Klin Lanwis
1 Ol man we oli kam Witnes blong Jeova oli kamaot long ‘olgeta kala, kantri, laen, mo lanwis.’ Nating se i olsem, olgeta ya oli wan pipol we i joengud, oli olsem wan brata nomo raon long wol. (Rev. 7:9) Hemia wan samting blong sapraes long wol ya we ol man blong hem oli seseraot. ?Be fasin joengud ya i kamtru from wanem? Hem i kamtru from we Jeova i ‘jenisim lanwis blong yumi i kam klin lanwis.’—Sef. 3:9, NW.
2 Gudfala Frut: ?Klin lanwis ya hem i wanem? Hem i stret save blong trutok blong Baebol, long saed blong Jeova mo stamba tingting blong hem, antap moa, hemia trutok long saed blong Kingdom blong God. Jisas i talemaot finis se trutok ya bambae i go kasem olgeta man tru long wan grup blong man long wol ya, hemia “slef we i stret mo waes.” Frut blong wok ya hemia se plante man “we lanwis blong olgeta i naranarafala,” oli stap joen naoia long trufala wosip.—Mat. 24:45, NW; Sek. 8:23.
3 Taem ol man oli lanem klin lanwis ya, oli wantem jenisim laef blong olgeta mo mekem i laenap wetem tingting blong Jeova. Oli lanem blong ‘joen gud we oli gat wan tingting nomo, mo we fasin blong olgeta i wan nomo.’ (1 Kor. 1:10) Mo tu, tijing ya we i kamaot long God i wokem ol gudfala fasin insaed long olgeta mo i pulum olgeta blong tokbaot ol samting we oli tru mo we oli bildimap narafala, olsem taem oli talemaot gud nius long ol narafala. (Taetas 2:7, 8; Hib. 13:15) Ol gudfala jenis ya oli givim ona long Jeova.
4 Eksampol, wan man we i jes harem gud nius, i gat plante kwestin blong askem. Ol Witnes oli halpem hem blong kasem ansa long olgeta kwestin ya long Baebol. Samting we man ya i harem i tajem hat blong hem, ale, hem i wantem stadi tu taem evri wik mo i stat kam long ol miting. Taem hem i kam long Haos Kingdom, hem i sapraes long gudfala welkam we ol brata sista oli givim long hem nomata se plante long olgeta oli gat defren kala blong skin. I no longtaem, man ya wetem woman blong hem, tufala i jenisim laef blong tufala mo tekem baptaes. Stat long taem ya i kam, man ya i halpem samwe long 40 narafala man blong oli kam man blong Jeova, wetem plante memba blong famle blong hem tu. Nating se hem i handikap smol, hem i statem wok blong paenia i no longtaem.
5 Tijim Narafala: Ol samting we oli stap hapen long wol oli mekem plante gudfala man oli tingting gud mo lukluk bakegen long laef blong olgeta. Yumi mas kam olsem Jisas we i wantem tumas blong halpem ol man. Sipos yumi tijimgud ol visit mo ol Baebol stadi, yumi save halpem ol gudfala man ya blong oli lanem klin lanwis.
6 Wan rod we i karem gudfala frut wetem ol man we oli bisi, hemia blong mekem wan sotfala stadi wetem olgeta stret long doa blong haos blong olgeta nomo. (km 5/02 pej 1) ?Yu yu traem rod ya finis? Taem yu stap mekem rere blong visitim wan man bakegen, lukluk long pepa insaed long Kingdom Wok Blong Yumi blong manis Jenuware 2002, mo jusum wan fastok we i stret long man ya. Plante long ol fastok we oli stap long pepa ya oli save givhan long yumi blong go stret insaed long buklet Wanem no Save buk. Lanemgud fastok ya we yu jusum, olsem nao bambae i isi blong yu talem fastok ya mo lidim man i go long wan haf blong buk. Jusum wan no tu vas we oli stap long haf ya, ale ridim vas ya mo storebaot. Nao, blong endem storian blong yu, yu save stanemap wan kwestin we bambae i lidim storian i go long narafala paragraf nekis taem.
7 Ol man blong Jeova oli stap kasem plante blesing from we oli lanem klin lanwis ya. I gud yumi wok strong blong halpem ol narafala blong joen wetem yumi blong “singaot long nem blong Jeova,” mo blong yumi wok tugeta “we solda blong wan i joen long solda blong narawan.”—Sef. 3:9, NW.