Prij Mo Givim Wan Gudfala Witnes
1 Jisas we i olsem “lida mo komanda blong ol man,” i rerem ol disaepol blong hem blong oli mekem wan bigfala wok blong prij. (Aes. 55:4; Luk 10:1-12; Wok 1:8) Aposol Pita i tokbaot wok we Jisas i givim long olgeta, i se: “Jisas ya, hem i talem long mifala, se mifala i mas talemaot gud nius blong hem long ol man. Mo mifala i mas talemaot [“givim wan gudfala witnes,” NW ] we God i putumap hem finis blong hem bambae i jajem olgeta man, olgeta we oli stap laef wetem olgeta we oli ded finis.” (Wok 10:42) ?Olsem wanem yumi save givim wan gudfala witnes?
2 Taem yumi tingbaot eksampol blong aposol Pol, yumi lanem plante samting long saed ya. Taem hem i mekem miting wetem ol elda blong kongregesen blong Efesas, hem i mekem olgeta oli tingbaot se: “Taem mi stap talemaot gud nius, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mi talemaot evri samting long yufala. Mo long fes blong ol laen blong Isrel mo long fes blong ol narafala man, mi mi stap talemaot ol trutok long olgeta. Mi talem stret [“givim gudfala witnes,” NW ] long olgeta, se oli mas tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.” Pol hem wan i kasem plante traem. Be nating, hem i gohed blong traehad blong faenem plante man mo talemaot gud nius long olgeta. Hem i no jes talemaot ol stamba trutok long ol man we oli lesin, be hem i traehad blong serem “olgeta samting we God i wantem.” Blong mekem samting ya, hem i rere blong wok strong mo blong lego sam samting we hem wan i wantem. Hem i gohed i se: “Mi no moa tingbaot laef blong mi, mi wantem kasem en blong rod blong mi. Mi wantem finisim wok ya we Jisas, Masta blong yumi i givim long mi blong mi mekem. Wok ya i blong talemaot gud nius ya [“givim gudfala witnes,” NW ] we God i lavem yumi tumas, mo i stap mekem i gud tumas long yumi.”—Wok 20:20, 21, 24, 27.
3 ?Olsem wanem yumi save folem eksampol blong Pol tede? (1 Kor. 11:1) Yumi save mekem olsem, taem yumi gohed blong traem faenem ol man mo ol famle we hat blong olgeta i stret, nating se yumi stap fesem sam traem mo hadtaem long laef blong yumi wanwan. Mo tu, yumi mekem olsem taem yumi traehad blong faenem ol man blong olgeta kantri mo lanwis mo talemaot gud nius long olgeta, mo taem yumi gobak long ol man we oli intres blong yumi givhan moa long olgeta. (Mat. 10:12, 13) Hemia i nidim taem, bigfala traehad, mo lav long olgeta man.
4 ?Yu Yu Save Mekem Wok Blong Haftaem Paenia? Tufala manis blong Maj mo Eprel oli nambawan janis blong haftaem paenia, mo long rod ya, yumi save givim gudfala witnes. !I gud tumas blong luk we las yia, plante oli mekem spesel traehad ya blong haftaem paenia!
5 Wan sista we i gat 80 yia mo i harem nogud long bodi blong hem, i lesin long ol tok we ogenaesesen blong Jeova i talem blong leftemap tingting blong yumi blong paenia, ale tok ya i tajem hat blong sista ya. Hem i raetem se: “Smol faea we i stap longtaem finis long hat blong mi i kam bigwan, mo mi harem se mi mas haftaem paenia wan moa taem bifo we mi ded.” Ale, hem i mekem plan blong haftaem paenia long manis Maj. Hem i talem se: “Faswan samting we mi mekem, se mi sidaon mo mi skelem sipos mi mi naf blong mekem wok blong haftaem paenia. Mi storian wetem gel blong mi from we mi nidim help blong hem. Mi mi sapraes taem hem tu i fulumap pepa blong haftaem paenia.” Long wan manis, olfala sista ya i mekem 52 aoa long wok blong prij. Hem i se: “Plante taem mi harem se mi no moa gat paoa, ale mi prea long Jeova blong hem i mekem mi mi strong. Long en blong manis, mi mi haremgud tumas, mo mi talem tangkiu plante taem long Jeova from we hem i bin givhan long mi. Mi mi wantem traem wok ya bakegen.” Maet gudfala stori ya i leftemap tingting blong plante narafala we oli wantem tumas blong haftaem paenia be oli gat bigfala trabol long saed blong bodi.
6 Wan brata i sek we oli sakemaot hem long wok blong hem, ale hem i tekem janis blong haftaem paenia. Taem ol dei oli stap pas, hem i haremgud tumas mo i wantem wok strong moa long wok blong prij. Long en blong manis, hem i gat wan niufala Baebol stadi finis. Hem i tingtingbak long manis ya i se: “!Wan nambawan manis!” !Hem i hapi tumas from we Jeova i bin lidim hem mo givhan long hem! Yes, Jeova i givim wan bigfala blesing long brata ya taem hem i mekem wan spesel traehad long wok blong prij, mo bambae Jeova i mekem i sem mak long yu.—Mal. 3:10.
7 Plante pablisa oli faenem se i no isi blong haftaem paenia. Nating se i olsem, wan bigfala namba blong ol brata mo sista we oli gat ol narafala wok, ol pikinini, mo ol prapa trabol long laef blong olgeta, oli mekem wok ya finis. Blong givim wan gudfala witnes, plante taem yumi mas rere blong lego taem mo paoa we yumi stap yusum long sam narafala samting. Be taem yumi mekem olsemia, yumi kasem ol blesing we oli bigwan bitim mak.—Prov. 10:22.
8 Manis Maj mo Eprel hemia tu gudfala manis blong haftaem paenia. I gat faef wiken long manis Maj. Yumi save yusum ol wiken ya mo ol sapa tu long wok blong prij. Long rod ya, maet samfala we oli stap wok fultaem blong kasem mane, oli save haftaem paenia tu. Antap long hemia, maet yu save yusum ol holide long manis Eprel. Maet samfala oli gat spel long wok no long skul, samting ya i save mekem i isi moa blong oli kasem 50 aoa long wok blong prij. Blong mekem plan blong prij 50 aoa long manis Maj no Eprel, maet yu save folem wan long ol program blong haftaem paenia we oli stap long haf ya. Tokbaot program blong yu wetem ol narafala; i sua se bambae yu save pulum sam narafala blong joen wetem yu long wok blong prij. Sipos i gat wan samting i stap blokem yu blong yu no save haftaem paenia, i gud blong putum wan mak blong tufala manis ya, mo tu, yu save sapotem ol narafala we oli mekem wok blong paenia. Mekem plan naoia blong prij moa long manis Maj mo Eprel.
9 Gat Tangkiu From Memoriol: Evri yia long taem blong Memoriol, fasin tangkiu from ransom sakrefaes blong Jisas i pulum plante taosen brata mo sista blong “pemaot taem” blong mekem wok blong haftaem paenia. (Efes. 5:15, 16, NW ) Las yia long Vanuatu, i gat 39 haftaem paenia long manis Maj mo 22 long manis Eprel. Hemia i olsem 30 long wanwan long tufala manis ya. Nao, skelem namba ya wetem 17 haftaem paenia blong ol narafala manis blong sevis yia. Long yia ya tu, taem blong Memoriol i wan gudfala janis bakegen blong soemaot trufala tangkiu we i stap long hat blong yumi from ransom sakrefaes blong Kraes. Yumi save mekem olsem taem yumi prij moa.
10 Taem Eprel 16 i stap kam klosap moa, tingbaot bigfala mining blong Memoriol. Tingbaot ol samting we oli kamaot jes bifo we Kraes i ded, mo ol samting we hem i tingting plante long olgeta mo we hem i wari from. Mo tu, tingbaot bigfala glad we i stap fored long Jisas mo olsem wanem samting ya i givhan long hem blong stanap strong taem oli mekem i nogud long hem. Tingting dip long bigfala wok blong hem naoia olsem Hed blong kongregesen, we i stap lukaot long wok blong prij mo wok blong mekem ol disaepol. (1 Kor. 11:3; Hib. 12:2; Rev. 14:14-16) Nao, traehad blong joen moa long wok blong prij blong soemaot tangkiu blong yu from olgeta samting we Kraes i mekem finis.
11 Pulum Ol Narafala Blong Givim Gudfala Witnes: Taem ol elda mo ol man blong givhan oli joen long wok blong haftaem paenia, i isi moa long olgeta blong leftemap tingting blong ol narafala long kongregesen. Taem oli joen wetem ol pablisa long wok blong prij mo taem oli visitim ol brata mo sista blong leftemap tingting blong olgeta, olgeta wanwan oli gat gudfala janis blong givhan long ol narafala blong joen fulwan long spesel wok ya. I gud we yumi evriwan i prea long saed ya, samting ya bambae i mekem yumi strong moa blong wok tugeta blong givim wan gudfala witnes.
12 Olgeta elda mo man blong givhan bambae oli sapotem fulwan ol plan blong kongregesen blong wok strong moa long manis Maj mo Eprel. Be elda we i lukaot long wok blong prij, hem bambae i lukluk moa long ol plan blong prij long kongregesen. Hem i mas makemaot ol ples we bambae oli mekem ol miting blong prij, ol dei, mo aoa we oli stret long bighaf blong ol pablisa, mo hem i mas meksua se oli talemaot ol plan ya long ol miting. Maet hem i mekem plan blong gat ol miting blong prij long ol defren taem blong dei, olsem nao, olgeta long kongregesen oli gat janis blong joen long ol defdefren fasin blong prij. Maet oli save prij long ol stoa, long rod, long evri haos wanwan, mekem ol visit, mo prij long telefon. Mo tu, elda ya i mas mekem plan blong gat naf buk, magasin, mo teritori blong tufala manis ya.
13 Long Maj bambae yumi seremaot Save buk, wetem tingting blong statem ol niufala Baebol stadi. Long pepa we i stap insaed long Kingdom Wok Blong Yumi blong Jenuware 2002, i gat sam gudfala advaes blong seremaot Save buk. Long Eprel, bambae yumi seremaot ol Wajtaoa mo Wekap! Traem yusum ol rod blong storian we oli stap long haf ya, “?Yumi Tokbaot Wanem Long Ol Magasin?” Yumi evriwan i mas tektaem blong reregud blong yumi save givim wan gudfala witnes.
14 !Yumi gat bigfala blesing ya blong wok aninit long Hed blong kongregesen, Jisas Kraes, mo blong gat janis blong talemaot gud nius long ol narafala! Taem manis Maj mo Eprel i stap kam klosap, yumi mas traehad bakegen blong mekem se tufala manis ya i moagud i bitim ol narafala manis bifo. Bambae yumi mekem olsem sipos yumi obei long tok blong Jisas blong prij mo givim wan gudfala witnes.
[Bokis blong pija long pej 4]
Sam Program We Yu Save Folem Blong Haftaem Paenia Long Maj Mo Eprel 2003
Dei Aoa
Mande 1 2 — — 2 —
Tusde 1 — 3 — — —
Wenesde 1 2 — 5 — —
Tasde 1 — 3 — — —
Fraede 1 2 — — — —
Sarede 5 4 3 5 6 7
Sande 2 2 3 2 2 3
Maj 56 56 54 55 50 50
Eprel 50 50 51 53 — —
?Wan long olgeta program ya i stret long yu?