‘Hem i Mas Holem Tok Ya’
1 Wan taem, Jisas i stap storian wetem ol disaepol blong hem long saed blong mared. Hem i tokbaot fasin we man i livim mared, i se hemia wan ‘rod we God nomo i openem.’ Ale hem i talem se: “Man we i save holem tok ya [blong no mared], hem i mas holem.” (Mat. 19:10-12) Sam yia biaen, aposol Pol i tokbaot se i gat blesing i stap blong olgeta we oli livim mared mo hem i leftemap tingting blong ol narafala blong oli folem fasin blong hem blong no mared. (1 Kor. 7:7, 38) Plante long yumi tede oli “holem tok ya” blong no mared mo oli stap harem gud from plante blesing. ?Wanem sam long ol blesing ya?
2 “I No Gat Narafala Tingting i Pulum Yufala”: Pol i luksave se from we hem i livim mared, hem i gat janis blong mekem wok blong Jeova we ‘i no gat narafala tingting i pulum hem.’ Tede, ol brata we oli no mared oli save joen long Ministeriol Trening Skul. Mo tu, olgeta we oli no mared maet oli faenem se oli fri moa blong joen long wok blong paenia, lanem wan narafala lanwis, muv i go long ples we i gat nid, wok long Betel, no tekem sam narafala spesel wok insaed long ogenaesesen blong Jeova. Man we i no mared i save gat moa taem mo janis tu blong mekem dip stadi mo tingting dip, mo blong toktok plante moa wetem Jeova blong talemaot ol samting we i stap long hat blong hem. Mo tu, plante taem, man we i no mared hem i save spenem moa taem blong halpem ol narafala. Olkaen wok olsem oli save ‘givhan long’ hemia we i no mared.—1 Kor. 7:32-35; Wok 20:35.
3 Taem man i mekem wok blong God we i no gat narafala samting i pulum hem, hem i save kasem plante blesing. Wan sista we i neva mared, i spenem 27 yia long Kenya. Hem i raetem se: “!Ol fren blong mi oli plante we plante, mo wok tu i plante! Mifala i wok tugeta [mo] mifala i visitim mifala. . . . From we mi mi no mared, mi fri moa mo mi save go long eni ples. Ale mi yusum janis ya blong stap bisi long wok blong prij. Hemia i karem bigbigfala glad i kam long mi.” Hem i go moa i se: “Long ol yia we oli pas, fasin fren blong mi wetem Jeova i kam strong moa.”
4 Sipos Yu No Mared, Yusumgud Taem Ya: Jisas i talem se risen from wanem man i jusum blong no mared, i mas “blong mekem ol wok blong God.” (Mat. 19:12) Man no woman we i no mared, hem i mas yusum gud janis ya we hem i gat, nao bambae hem i save kasem glad mo ol blesing we i kamaot from. Plante long olgeta we oli no mared, oli luksave se fulap gudfala samting i save kamaot taem oli livim mared. Ale, oli tekem ol janis we oli gat blong mekem plante moa wok mo oli dipen long Jeova blong kasem waes mo paoa we oli nidim blong mekem olsem.