Soem Eksampol Taem Yu Jenis Gud Mo Mekem Ol Gudfala Wok
1. ?Olsem wanem yumi save soem tangkiu long God long distrik asembli we i stap kam?
1 I no longtaem bambae yumi gat spesel janis ya blong kakae long tebel blong Jeova long 2003 Distrik Asembli ya “Leftemap Nem Blong God.” !Tangkiu tumas long Jeova we i singaot yumi blong go long lafet ya we i fulap long ol kakae long saed blong spirit! Yumi wantem ona long hem mo soem tangkiu from ol kakae ya we hem i givim. Yumi save mekem olsem sipos yumi lukaot gud long stael klos mo hea blong yumi long taem ya.—Sam 116:12, 17.
2. ?From wanem i impoten we bodi blong yumi i klin mo klos blong yumi i stret?
2 Stap Klin Mo Folem Oda: Klos mo hea blong yumi i mas soemaot se yumi man blong God, we hem i klin mo i laekem se ol samting oli stretgud. (1 Kor. 14:33; 2 Kor. 7:1) Bodi blong yumi, hea, mo sel fingga blong yumi oli mas klin mo klos blong yumi i mas stret. Tede ol man oli dresap olbaot nomo. Be wan Kristin i no mas ting se from we ol man blong plei long film no spot oli dresap olbaot ale i oraet we hem tu i dresap olbaot. Nogat. Sipos yumi folem stael blong wol, ol man bambae oli no luksave se hu nao olgeta we oli wosipim trufala God mo hu olgeta we oli no wosip long hem.—Mal. 3:18.
3. ?Olsem wanem blong meksua se klos mo hea blong yumi i laenap wetem advaes we i stap long 1 Timoti 2:9, 10?
3 Klos We i Stret Long Ol Minista Blong God: Taem aposol Pol i raet i go long Timoti we hem i wan Kristin elda, hem i talem se i gud sipos “ol woman oli putum klos blong olgeta we i stret nomo, i no blong pulum ae blong man, mo i no blong flas. . . . Olgeta oli mas mekem ol gudgudfala wok, from we hemia i prapa fasin blong ol woman we oli stap talem se oli lavem God.” (1 Tim. 2:9, 10) Sipos yumi wantem meksua se ol klos mo hea blong yumi i stretgud yumi mas tektaem blong tingting gud. Klos blong yumi i mas stret, i mas klin, mo i no mas bitim mak. I nogud stael blong yumi i soem fasin olbaot no fasin les, mo i nogud hem i pulum ae blong ol man blong lukluk ol haf blong bodi blong yumi.—1 Pita 3:3.
4, 5. ?Wanem woning we ol Kristin man mo woman oli mas harem?
4 Mo tu, Pol i givim woning long fasin blong go bitim mak blong ‘mekem hea i flas tumas, mo putum ol flas samting we oli wokem long gol mo perel, mo ol dres we praes blong olgeta i antap tumas.’ (1 Tim. 2:9) Ol Kristin woman oli no mas bitim mak long fasin blong putum ol jen no nara samting olsem, wetem kala long ae mo maot, mo ol narnarafala samting blong flasem bodi.—Prov. 11:2.
5 Advaes ya we Pol i givim long ol Kristin woman i olsem wan rul we i stret tu long ol Kristin man. Ol brata oli mas lukaot long ol stael we oli soem spirit blong wol. (1 Jon 2:16) Eksampol, long sam kantri, plante man oli laekem stael blong werem ol bigbigfala sot no ol bigbigfala traoses we oli hang i kamdaon hafwei long bel. Be stael ya i no stret long wan minista blong God.
6, 7. ?Olsem wanem ol pikinini oli save presem Jeova, mo wanem wok blong ol papa mama?
6 Gudfala Wok Blong Papa Mama Mo Pikinini: Long wol tede, plante pikinini oli no moa soem respek long narafala. Be ol pikinini blong yumi oli defren, mo samting ya i presem Jeova mo ogenaesesen blong hem. Be, samtaem, i gat problem i kamaot taem papa mama i no lukaot gud long ol pikinini blong olgeta. (Prov. 29:15) Taswe, papa mama i no mas lego pikinini blong olgeta i fri blong mekem eni samting we i wantem, long hotel, no haos we famle i slip long hem, mo long ples blong asembli tu.
7 Sam papa mama oli toktok wetem ol pikinini blong olgeta bifo long taem blong asembli blong mekem oli save long wanem kaen fasin we oli sud gat long taem olsem. (Efes. 6:4) Oli halpem pikinini blong olgeta blong kasem save se trufala Kristin lav i pulum yumi blong yumi “no save mekem ol fasin we man i sek nogud long hem,” mo yumi ‘no save tingbaot yumi nomo.’ (1 Kor. 13:5, NW ) Distrik asembli i wan taem blong letem Jeova i tijim yumi, mo ol pikinini, wetem ol bigman tu, oli respektem plan ya taem oli mekem fasin we i stret long ples blong asembli mo long ol narafala ples tu.—Aes. 54:13.
8. ?Gudfala fasin blong yumi i save mekem wanem long ol narafala man?
8 Gudfala fasin blong yumi i save givhan bigwan blong stretem rong tingting blong ol man mo i save pulum sam long olgeta i kam long trufala wosip. (Mat. 5:16; 1 Pita 2:12) I gud yumi soem gudfala fasin long olgeta man we yumi mitim long distrik asembli nao bambae yumi givim gudfala witnes long olgeta. Long rod ya bambae yumi ‘soemaot long fes blong olgeta man, fasin blong yumi blong mekem gudfala wok’ blong leftemap nem blong God, Jeova.—Taet. 2:7.