Ansa Long Wan Kwestin
◼ ?Wanem kaen klos we yumi mas putum taem yumi visitim ol haos we oli yusum blong mekem wok blong Jeova?
Raon long wol, ol Haos Kingdom, Haos Asembli, Haos Betel mo ol narafala haos blong branj ofis, oli ol spesel ples we yumi givim long Jeova blong mekem wok blong hem. Ol haos ya oli no flas, oli klin, mo oli no olbaot. From samting ya yumi mas respektem ol ples olsem. Hemia i defren olgeta long ol samting we yumi luk long wol blong Setan tede. Olgeta we oli visitim ol ples ya we yumi yusum blong mekem wok blong Jeova oli mas soemaot klia se oli man blong Jeova mo oli man blong wok blong hem.
Yumi Kristin, yumi mas ‘soemaot we yumi man blong wok blong God’ long evri samting we yumi mekem, hemia i minim long saed blong klos we yumi putum mo fasin blong mekem hea tu. (2 Kor. 6:3, 4) Ol fasin blong yumi oli mas stret tu. Oltaem ol klos mo hea blong yumi oli mas soem se yumi gat respek mo ona olsem ol man blong Jeova God. Hemia samting we yumi mas mekem, speseli taem yumi visitim hedkwota long Niu Yok wetem ol narafala branj ofis raon long wol.
Buk ya Organized to Do Jehovah’s Will i givim sam save long yumi long saed blong nid blong stap klin, putum klos we i stret, mo fasin blong mekem hea, taem yumi stap long wok blong prij mo taem yumi go long miting. Mo long pej 138, haf 3, oli raetem se: “Yumi mas tingbaot se nem ya Betel i minim ‘Haos Blong God.’ Taswe, klos, hea mo fasin blong yumi oli mas sem mak olsem taem yumi go long ol miting long Haos Kingdom blong mekem wosip long Jeova.” Ol pablisa blong Kingdom we oli visitim ol Betel long ples blong olgeta, no ol Betel long narafala ples tu, oli mas folem ol rul mo oli mas gat gudfala fasin tu. Long rod ya, oli soem se oli gat tangkiu mo respek we i stret long ol ples olsem.—Sam 29:2.
Ol klos blong yumi oli mas soemaot se yumi ‘ol man we oli stap talem se oli lavem God.’ (1 Tim. 2:10) Taem klos mo hea blong yumi oli stret, samting ya bambae i givhan long ol narafala blong oli gat respek long klin wosip blong Jeova. Be samfala brata sista, taem oli visitim ol Betel, oli putum ol klos blong spel no pleplei nomo, oli olbaot, no oli soemaot bodi blong olgeta. Ol klos olsem oli no soem Kristin fasin nating. Fasin we yumi mas gat long ol Haos Betel i mas sem mak long ol narafala ples tu we yumi stap long hem, oltaem yumi mas folem ol rul we ol man blong God oli mas folem, mo yumi mas mekem olgeta samting blong leftemap nem blong God.—Rom 12:2, 1 Kor.10:31.
Taswe taem yu visitim ol hedkwota mo ol branj ofis long Niu Yok, no sam narafala branj ofis raon long wol, nating se yu plan blong go visitim no taem yu mekem turis, askem long yu wan se: ‘?Ol klos mo hea blong mi oli stret, oli klin, mo oli soem ona long ples we bambae mi visitim? ?Hem i soemaot ol fasin blong God we mi wosipim? ?Klos mo hea blong mi bambae i pulum ae blong ol man, no bambae i mekem oli harem nogud?’ !Oltaem ol klos mo hea blong yumi oli mas “leftemap tok blong God ya we i sevem yumi, long fes blong ol man”!—Taet. 2:10.