Ansa Long Wan Kwestin

● ?From wanem yumi mas lukaotgud long ol klos mo hea blong yumi taem yumi go visitim wan Betel mo sam brenj-ofis blong Sosaete raonabaot long wol?

Fasin blong ol Kristin long evri dei long laef blong ol i mas oraet oltaem. Klos mo hea blong yumi i mas soemaot se yumi rili man blong Jeova God, mo laef blong yumi i klin. I impoten tumas we yumi keagud long samting ya bifo we yumi go visitim wan Betel no ol brenj-ofis blong Sosaete raonabaot long wol. Buk ya Organized to Accomplish Our Ministry i soemaot bakegen from wanem yumi mas klin gud, from wanem ol klos mo hea blong yumi oli mas stret gud taem yumi go long wok blong prij mo taem we yumi go long ol Kristin miting. Long pej 131 blong buk ya, stret long haf 1, yumi save ridim ol tok ya, se: “Yumi mas mekem sem mak nomo taem we yumi visitim Betel long Bruklin no taem we yumi go visitim wan brenj-ofis blong Sosaete raonabaot long wol. Yumi no mas foget se tok ya Betel i min se ‘haos blong God.’ Taswe, bifo we yumi go visitim wan Betel, yumi mas lukaotgud long hea, klos mo ol fasin blong yumi. Yes, yumi mas mekem olsem we yumi stap go long ol miting long haos-Kingdom.”

Aposol Pol i talem we ‘yumi stap stanap long fes blong olgeta enjel mo long fes blong olgeta man long wol blong oli lukluk yumi.’ (1 Korin 4:⁠9) From samting ya nao, yumi mas lukaotgud long klos mo hea blong yumi blong mekem se ol narafala man oli gat gud tingting long saed blong trufala wosip blong Jeova. Be i luk olsem we samfala brata sista oli gat fasin we i olbaot nomo taem we oli visitim ol ofis blong Sosaete. Fasin olsem i no stret. Long evri haf blong Kristin laef blong yumi, yumi wantem tumas blong respektem olgeta hae rul we God i givim long yumi. Yumi wantem mekem i klia we ol man blong hem oli defren long ol man blong wol, oli mekem evri samting blong leftemap nem blong God. (Rom 12:​2; 1 Korin 10:31) I gud tu sipos yumi tokbaot bisnes ya wetem ol man we oli stadi Baebol wetem yumi, mo olgeta we oli go visitim wan Betel, no enikaen haos blong Sosaete. Yumi mas talem wan taem moa long olgeta from wanem klos mo hea blong yumi oli mas stret gud oltaem.

Bifo we yufala i go visitim wan haos blong Sosaete, i gud we yufala i askem ol kwestin ya long yufala: ‘?Klos mo hea blong mi oli oraet nomo? (Maeka 6:⁠8) ?Tufala fasin ya blong mi oli leftemap nem blong God we mi stap wosip long hem? ?Bambae mi pulum ae blong man, no maet man i sek long mi? ?Mi stap soemaot gudfala rod long olgeta we oli stap visitim Betel blong faswan taem?’ Sipos yumi lukaotgud oltaem long klos mo hea blong yumi, ‘bambae yumi leftemap tok blong God ya we i sevem yumi, long fes blong ol man.’​—⁠Taet. 2:⁠10.