Givim Ona Long Jeova Taem Yumi Tekem Evri Janis Blong Prij
1 Ol man blong Jeova we oli stap tru long hem oli lukaotem ol defren rod evri dei blong givim ona long hem. (Sam 96:2, 3; Hib. 13:15) Wan long ol rod ya hemia nao blong tekem evri janis blong prij. Plante man we oli wosip long Jeova tede oli talem tangkiu long hemia we i bin tekem janis blong talemaot gud nius blong Kingdom long olgeta.
2 Taem yumi tekem janis blong prij long wan man, plante taem i moa isi long ol narafala blong lesin long gud nius blong Kingdom. Wan eksampol, taem Jisas i toktok wetem wan woman Sameria long wel blong Jekob, samting ya i pulum plante moa man blong lesin long gud nius. (Jon 4:6-30, 39-42) Taem Pol mo Saelas i stap kalabus long Filipae, tufala i givim witnes long wan man we i lukaot long kalabus, mo man ya wetem olgeta we i laef long haos blong hem oli kasem trutok.—Wok 16:25-34.
3 Ol Janis: ?Wanem sam janis we yumi gat blong givim witnes? Sam oli prij taem oli go pem kakae long stoa, taem oli yusum pablik transpot, no taem oli wet blong go luk dokta. Sam narafala oli save prij taem oli spel smol long wok no long skul. Yumi save putum wan buk blong sosaeti long wan ples we i moa isi blong ol man oli save luk, mekem se, taem oli luk buk ya bambae oli wantem askem kwestin long saed blong bilif blong yumi.—1 Pita 3:15.
4 ?Olsem Wanem Blong Statem Storian?: Wan gel we i gat seven yia mo i stap sem, i harem long ol miting se i impoten tumas blong prij. Mekem se taem hem i go wetem mama blong hem blong pem kakae long stoa, gel ya i karem tu buklet insaed long basket blong hem. Taem mama blong gel ya i bisi long ples blong pem ol kakae, gel ya i givim wan buklet long wan woman, mo woman ya i glad blong karem buklet ya. Taem oli askem long gel ya se olsem wanem hem i no fraet blong go storian long woman ya, gel ya we i stap sem i talem se: “Mi jes talem nomo long mi wan se, ‘!Redi, Set, Go!’ !Ale, mi mi go!”
5 Blong tekem janis blong prij, yumi nidim blong gat fasin olsem gel ya we i rili wantem blong givim witnes. ?Wanem i save givhan long yumi? Yumi nid blong prea, blong yumi no fraet blong toktok. (1 Tes. 2:2) I gud we long tingting blong yu, yu rerem wan kwestin no wan tok we ol man oli intres long hem mo we yu save yusum blong statem storian. Afta, trastem Jeova blong blesem traehad blong yu.—Luk 12:11, 12.
6 Blong tekem evri janis blong prij long ol man we yumi luk evri dei, i givim bigfala ona long Jeova mo i givim glad long yumi. Maet hem i halpem wan man blong faenem rod ya blong kasem laef we i no save finis.