Wokhad Blong “Talemgud” Tok Blong God Long Olgeta Man
1, 2. ?Wanem samting we yu rili tinghae long hem taem yu tingbaot fasin blong Pol blong talemaot gud nius, mo olsem wanem yumi save folem eksampol blong hem blong “talemgud” evri samting we yumi mas talemaot?
1 Jisas mo plante narafala man blong God blong bifo oli wok strong blong talemaot gud nius. Aposol Pol tu i wok strong blong talemaot gud nius mo i “talemgud” evri samting we ol man oli mas harem nomata wanem ples we hem i stap long hem. Nating se oli putum hem long wan haos mo hem i kalabus long haos ya, be “hem i glad blong tekem olgeta we oli kam blong luk hem, oli kam long haos blong hem. Hem i stap talemaot we God i King, mo we olgeta man oli mas ona long hem, mo hem i stap tijim ol man long gud nius blong Jisas Kraes, Masta blong yumi, we tingting blong hem i no seksek, mo i no gat man i save blokem hem.”—Wok 28:16-31.
2 Yumi tu yumi save wokhad blong “talemgud” Tok blong God long eni taem. Hemia i minim tu se yumi prij long ol man we yumi mitim taem yumi wokbaot i go mo kambak long Distrik Asembli blong yia ya we nem blong hem “Leftemap Nem Blong God.”—Wok 28:23; Sam 145:10-13.
3. ?Olsem wanem fasin blong tekem janis blong prij i defren long fasin blong prij nomo taem yumi gat janis?
3 ?Yumi Prij Nomo Taem i Gat Janis No Yumi Tekem Janis? ?Olsem wanem? ?Tufala samting ya i defren? Yes tufala i defren olgeta. Wan samting we yumi mekem nomo taem yumi gat janis i minim se yumi no plan blong mekem mo samting ya i no rili impoten. Hemia i no stret long wok blong prij. Olsem Pol, wok blong leftemap nem blong God taem yumi prij, hem i impoten long yumi. Mo taem yumi mekem trip blong yumi i go long asembli, yumi mas plan se bambae yumi givim witnes long eni ples. Be i stret blong talem se yumi tekem janis taem yumi prij long ol man long eni ples, from we fasin blong yumi i olsem blong fren nomo wetem olgeta, mo ol man oli no fraet olsem taem yumi go long haos blong olgeta. Fasin blong prij olsemia i karem gudfala frut.
4. ?Wanem i mekem se Pol i save prij nating se hem i kalabus long haos ya?
4 Stap Rere Blong Givim Witnes: Taem Pol i stap kalabus long haos ya long Rom, hem i mas faenem rod blong prij long narafala. Taswe, hem i stap singaot ol lida blong ol man Jiu oli kam long haos blong hem. (Wok 28:17) Nating se i gat wan Kristin kongregesen finis long Rom, Pol i luksave se komuniti blong ol man Jiu we i stap long ples ya oli no bin toktok plante wetem ol Kristin blong kasem stret save long saed blong Kristin bilif. (Wok 28:22; Rom 1:7) Ale, hem i no fraet blong “talemgud” trutok long saed blong Jisas Kraes mo Kingdom blong God.
5, 6. ?Weples yumi save tekem janis blong prij, mo blong karem frut long wok ya yumi mas rere olsem wanem?
5 Tingbaot hamas man we yu save toktok wetem olgeta taem yu mekem trip i go long asembli. I sua se bighaf blong ol man ya oli gat smol save nomo long saed blong ol Witnes blong Jeova. Maet oli no save se yumi stap mekem Baebol stadi long haos blong man, fri nomo. Stap rere oltaem blong lukaot ol janis blong prij taem yu wokbaot i go long narafala ples, taem transpot we yu stap long hem i stop smoltaem long wan stesen, taem yu stop blong fulumap bensin, taem yu go long stoa, slip long wan hotel, kakae long restorong, ron long taksi no sevis bas, no long wan narafala ples bakegen. Tingting fastaem long wanem we yu save talem blong statem storian mo givim smol witnes. Maet long ol dei we oli kam yu save stat blong tekem janis blong prij long ol man raonabaot long yu, long ol famle, long ol fren long wok, mo long sam narafala man bakegen.
6 Yu nidim ol buk we yu save yusum taem yu tekem janis blong prij. ?Wanem buk we yu save karem? Yu save yusum traket ya ?Yu Yu Wantem Lanem Moa Long Saed Blong Baebol? Tokbaot paragraf wan kasem faef we oli talem ol defdefren risen from wanem yumi mas ridim Baebol. Soem lashaf blong traket ya we i talem se sipos man i wantem, hem i save askem blong stadi Baebol. Taem yu faenem wan man we i intres, soem buklet ya Wanem long hem. Sipos yu ting se maet bambae yu mitim ol man we oli toktok wan narafala lanwis, tekem smol buk ya wetem yu Good News for All Nations. Pej 2 blong smol buk ya i talem olsem wanem blong yusum buk ya blong givim witnes. Sipos yu wokbaot long trak, maet bambae yu save tekem sam moa buk bakegen we yu save givim long ol man we oli rili soem intres long gud nius blong Kingdom.
7, 8. ?Wanem sam advaes blong tingbaot long saed blong klos mo fasin blong yumi taem yumi wokbaot blong go mo kambak long asembli, no taem yumi spel afta asembli?
7 Tingbaot Klos Mo Fasin Blong Yu: Yumi mas meksua se fasin blong yumi mo klos wetem hea blong yumi tu oli no givim rong tingting long ol man, mo i no pulum olgeta blong “tok nogud” long ogenaesesen blong Jeova. (Wok 28:22) Hemia i no minim nomo taem yumi go long asembli, be tu, taem yumi wokbaot blong go mo kambak long asembli, no taem yumi spel afta long asembli. Wajtaoa blong Ogis 1, 2002, pej 18 haf 14, i givim advaes ya: “Yumi no mas putum ol klos we oli pulum ol narafala blong lukluk yumi, no we stael blong olgeta i narakaen, no we oli pulum narafala blong gat rong tingting, no we oli soemaot bodi blong yumi, no we oli folem ol krangke stael blong wol. Ol klos blong yumi oli mas stret long ol man ‘we oli stap talem se oli lavem God.’ ?Tok ya i pulum tingting blong yumi, no? Hemia i no min se yumi jenis gud blong go long ol miting blong kongregesen nomo [mo long taem blong asembli], mo yumi putum ol klos olbaot long ol narafala taem. Nogat. Oltaem klos blong yumi i mas soemaot se yumi lavem God, yumi ona long hem, from we 24 aoa evri dei, yumi stap olsem ol minista blong God mo ol Kristin.”—1 Tim. 2:9, 10.
8 Yumi no mas bitim mak long klos blong yumi be yumi mas pulum ol man blong oli respektem yumi. Sipos klos mo fasin blong yumi i soemaot se yumi man blong God, bambae yumi no sem blong tekem janis blong prij long eni ples from we yumi sua se ol man bambae oli no lukluk nogud long yumi.—1 Pita 3:15.
9. ?Wanem gudfala frut we Pol i kasem long Rom from we hem i gohed blong prij?
9 Gudfala Frut i Kamaot Taem Yumi Tekem Janis Blong Prij: Long tu yia ya we Pol i stap kalabus long wan haos long Rom, hem i karem gudfala frut from traehad we hem i mekem blong prij. Luk i talem se “oli harem tok blong hem, nao oli bilif long hem.” (Wok 28:24) Pol hem wan i skelem ol gudfala frut we i kamaot taem hem i wokhad blong “talemgud” tok blong God long olgeta man. Hem i se: “Ol samting ya we oli kam kasem mi, oli stap givhan long wok blong gud nius blong Kraes. Nao from ol samting ya, olgeta soldia we oli stap gad long haos blong Sisa, mo ol narafala man tu long ples ya, oli save finis we mi mi stap long kalabus, from we mi mi man blong wok blong Kraes. Mo from we mi stap long kalabus, bighaf blong ol brata blong yumi oli stap bilif strong moa long Masta blong yumi. Naoia olgeta oli no moa fraet, mo oltaem oli stap mekem tingting blong olgeta i strong moa blong talemaot tok ya blong God.”—Fil. 1:12-14.
10. ?Wanem gudfala frut we wan hasban mo waef blong hem tufala i kasem las yia taem tufala i tekem janis blong prij?
10 Las yia, wan hasban wetem waef blong hem tufala i aot long distrik asembli mo tufala i go kakae long restorong. Tufala i tekem janis blong prij long wan woman we i wok long restorong ya. Woman ya i askem se from wanem tufala i werem ol baj, nao tufala i storebaot asembli ya mo tufala i talemaot gudfala hop we Baebol i talem long saed blong fiuja. Ale tufala i givim traket ya long hem, ?Yu Yu Wantem Lanem Moa Long Saed Blong Baebol? mo tufala i eksplenem rod blong stadi Baebol. Woman ya i talem se hem i wantem we wan Witnes i visitim hem, hem i raetem nem mo adres blong hem long las pej blong traket ya mo i askem tufala blong sanem wan Witnes i kam luk hem. ?Wanem gudfala frut we yu yu save kasem long yia ya sipos yu wokhad blong “talemgud” tok blong God long olgeta man?
11. ?Wanem fasin we bambae yumi nidim sipos yumi wantem “talemgud” tok blong God long olgeta man mo mekem se gud nius i go moa long yia ya?
11 Mekem Gud Nius i Go Moa: Tingbaot. Ating Pol i glad bigwan taem hem i harem se ol Kristin brata sista blong hem oli stap folem eksampol blong hem blong wok strong. I gud yumi evriwan i traehad blong mekem se gud nius i go moa taem yumi tekem janis blong tokbaot bilif blong yumi we i stanap long Baebol sem taem we yumi stap harem gud long distrik asembli blong yia ya.
[Bokis blong pija long pej 3]
Ol Buk We Yumi Nidim Taem Yumi Tekem Janis Blong Prij
■ ?Yu Yu Wantem Lanem Moa Long Saed Blong Baebol? (traket)
■ ?Wanem Samting We God i Wantem Yumi Blong Mekem? (buklet)
■ Good News for All Nations (smol buk)
■ Sam narafala buk we oli save tijim man long ol stamba trutok
[Bokis blong pija long pej 4]
!Yu No Fogetem Olgeta Ya!
?Hu olgeta ya we yumi no mas fogetem? Hemia olgeta we oli bin kam long Memoriol blong ded blong Kraes mo long spesel pablik tok. ?Yumi singaot olgeta finis blong oli kam long distrik asembli blong yia ya? Ating plante long olgeta bambae oli glad blong kam sipos yumi leftemap tingting blong olgeta. Bambae oli harem gud blong kampani wetem ol brata sista long asembli, mo bambae i leftemap tingting blong olgeta taem oli lesin long ol gudfala tok blong asembli ya. Samting ya i save pulum olgeta oli kam klosap moa long Jeova mo ogenaesesen blong hem. ?From wanem yu no traem singaot olgeta mo luk wanem bambae oli talem? Talem klia evri samting we oli nidim blong save, olsem stret dei mo ples blong asembli ya, stret taem we bambae program i stat mo i finis, mo smol save long saed blong program blong asembli we i stap long las pej blong Wekap! blong Jun 8, 2003 (Franis mo Inglis).