Ansa Long Wan Kwestin

◼ ?I stret blong eksplenem presen mane, taem yumi yusum telefon blong givim witnes?

Taem yumi prij long wan man we yumi luk, yumi save eksplenem se, wok blong tijim Baebol we ol Witnes blong Jeova oli mekem raon long wol, i stanap long ol presen mane we ol man oli givim long gladhat blong olgeta, mo yumi glad blong karem ol presen mane olsem. Be, yumi no mas talemaot, no eksplenem presen mane, taem yumi yusum telefon blong givim witnes, from we samting ya bambae i givim tingting long ol man se, yumi yusum telefon blong fosem ol man blong givim mane. Wok blong prij we ol Witnes blong Jeova oli mekem i no wan wok blong winim mane.—2 Kor. 2:17.

◼ ?Taem yumi yusum telefon blong givim witnes, mo wan man i talem se hem i no moa wantem we ol Witnes blong Jeova oli ring long hem, bambae yumi mekem wanem?

Yumi mas respektem wanem we man ya i talem. Raetem long wan pepa, dei we man ya i talem se hem i no wantem, mo nem blong man ya tu, mo putum pepa ya long envlop blong ol teritori blong prij. Olsem nao, ol brata sista bambae oli no moa ring long namba ya bakegen. Wan taem long wan yia, ol brata bambae oli lukluk bakegen long lis blong ol man ya we oli no wantem yumi blong ring long olgeta. Elda we i lukaot long wok blong prij bambae i jusum sam brata no sista we oli gat save, mo we oli nafgud, blong go visitim olgeta ya, blong luk olsem wanem long tingting blong olgeta long saed blong ol Witnes blong Jeova.—Lukluk Ansa Long Wan Kwestin long Kingdom Wok Blong Yumi, long Jenuware 1994.