Serem Ol Buk Long Teritori We Ol Man Oli Toktok Ol Defdefren Lanwis
1. ?From wanem plante kongregesen oli nidim ol buk long ol defdefren lanwis?
1 Long plante ples naoia, taem yumi prij, yumi faenem ol man we oli kamaot long ol defdefren kantri. Plante long ol man ya oli save lanem trutok hareap mo kasem save klia moa, taem oli kasem tijing long prapa lanwis blong olgeta. ?Wanem rod i stap we yumi save folem blong givim ol buk long saed blong Baebol long ol man we oli intres, be long lanwis blong olgeta?
2. ?Wanem plan i mas stap taem tu no moa kongregesen oli mekem miting long defren lanwis be oli prij long semfala teritori?
2 ?Wetaem i Stret Blong Givim Buk?: Long sam ples, i gat tu no bitim tu kongregesen we oli mekem miting long defren lanwis, be oli stap prij long semfala teritori. Long ples olsem, ol elda oli mas wokgud wetem elda we i lukaot long wok blong prij blong putumap wan plan we evriwan i agri long hem. Plan ya i mas mekem se ol kongregesen ya oli save prij long evri man we oli toktok ol defdefren lanwis ya. Taem ol pablisa blong wan kongregesen oli prij long ol haos wanwan, oli no mas yusum ol buk long lanwis we narafala kongregesen i yusum. Be, taem ol pablisa oli tekem janis blong prij long rod no narafala pablik ples, oli save serem ol buk long olgeta lanwis we ol man long ples ya oli save long hem.—Lukluk Ansa Long Wan Kwestin long Kingdom Wok Blong Yumi blong Oktoba 1990 (Franis mo Inglis).
3. ?Wetaem i stret blong wan kongregesen i oda long sam buk long wan narafala lanwis?
3 ?Wetaem Blong Oda Long Ol Buk?: ?Yumi save mekem wanem sipos i gat plante man lelebet long eria blong yumi we oli stap toktok long wan narafala lanwis, be i no gat kongregesen blong ol brata we oli save toktok long lanwis blong olgeta? Long taem olsem, wanwan kongregesen i save mekem wan smol oda blong ol stamba buk we maet oli stap finis long lanwis blong ol man ya, maet i gat sam traket, ol buklet ya Wanem mo Fren Blong God, mo Save buk tu. Ol pablisa oli save serem ol buk ya taem oli mitim ol man we oli ridim lanwis ya.
4. ?Olsem wanem blong kasem wan buk long narafala lanwis we kongregesen i no gat?
4 ?Olsem Wanem Blong Oda Long Ol Buk?: ?Sipos yumi visitim wan man we i toktok narafala lanwis, be kongregesen i no gat buk long lanwis blong man ya, olsem wanem blong kasem buk long lanwis blong hem? Pablisa ya i save luk brata we i lukaot long ol buk blong faenemaot wanem buk oli wokem finis long lanwis blong man ya. Ale, wanem buk we hem i wantem, bambae oli save raetem long nekis oda blong kongregesen.
5. ?Yumi save mekem wanem sipos yumi nidim sam buk hareap mo yumi no save wet long oda blong kongregesen?
5 Sipos pablisa i wantem se buk ya i kam hareap, hem i save askem wan long ol elda long Sevis Komiti sipos oda ya i save go bifo we kongregesen i sanem nekis oda blong ol buk blong hem. Sipos oli agri long samting ya, brata we i lukaot long ol buk, no wan narafala brata we hem i jusum, i save telefon i go stret long branj ofis blong pasem oda ya.
6. ?From wanem yumi seremaot ol Kristin buk blong yumi?
6 Yumi mas yusum gud ol Kristin buk blong yumi blong halpem “olkaen man,” nomata wanem lanwis blong olgeta, blong ‘oli kasem stret save long trutok nao bambae oli sef.’—1 Tim. 2:3, 4, NW.