Yusum Ol Buk We Oli Tokbaot Baebol Long Waes Fasin
1, 2. ?Plante man oli tingting olsem wanem long ol buk blong yumi, mo wanem kwestin i kamaot from?
1 “Mi mi bin ridim ol buk blong yufala stat long 1965 kam kasem tede. Mi mi jekem ol vas long Baebol, mo mi faenem se evri samting long ol buk blong yufala oli laenap wetem Baebol. Mi bin wantem tumas blong save trutok long saed blong God mo Jisas, mo mi talem stret se mi stap faenemaot ol stret ansa long ol buk blong yufala mo long Baebol.” Hemia leta we wan man i raetem i go long hedkwota blong ol Witnes blong Jeova. Long semfala leta ya, man ya i askem sipos ol Witnes oli save mekem Baebol stadi long hem.
2 Plante milian man long wol oli harem olsem man ya, oli glad long ol buk blong ‘slef we i stret mo waes’ we oli givhan long olgeta blong kasem save Baebol. (Mat. 24:45, NW ) Evri yia, ol Witnes oli wokem plante plante buk blong givhan long olgeta we hat blong olgeta i stret, blong oli “save trutok blong [God].” (1 Tim. 2:4) ?Olsem wanem yumi save yusum ol buk blong yumi we oli stanap long Baebol long waes fasin?
3. ?Yumi save mekem wanem blong no westem ol buk blong yumi?
3 No Westem Ol Buk: Taem ol manis oli pas, yumi save hivimap plante buk we yumi no yusum. ?Wanem samting yumi save mekem blong no westem ol gudfala buk blong yumi? Yumi mas gat fasin luksave taem yumi karem ol buk we yumi wantem seremaot long wok blong prij. Yumi no karem plante buk wantaem blong seremaot long ol man, be yumi karem wan no tu nomo, nao taem yumi seremaot olgeta finis, ale yumi gobak blong karem sam moa. Fasin ya bambae i mekem se yumi no hivimap plante buk long haos blong yumi. Long sem fasin, sipos yumi gat plante magasin we yumi no seremaot, i moagud we yumi daonem namba blong oda blong yumi.
4. ?Wanem samting kongregesen i save mekem sipos i gat plante tumas blong sam kaen buk long stok blong kongregesen?
4 Ol Buk We Oli Plante Tumas Long Stok Blong Kongregesen: Sipos i gat sam kaen buk we oli plante tumas long stok blong kongregesen, maet brata we i lukaot long ol buk i wantem jekem wetem ol narafala kongregesen long eria blong hem, blong luk sipos oli save yusum ol buk ya. Ol pablisa oli save seremaot ol olfala buk long ol memba blong famle blong olgeta we oli no bilif, mo long ol Baebol studen, mo long ol narafala. Maet olgeta we oli jes joen long kongregesen, oli glad blong gat ol olfala buk ya blong putum olgeta long tiokratik laebri blong olgeta.
5. ?Olsem wanem yumi save soemaot tangkiu from ol buk blong yumi?
5 Yumi wantem se ol buk blong yumi oli mekem wok blong olgeta, hemia blong givhan long olgeta we hat blong olgeta i stret, blong oli kasem save long stamba tingting blong Jeova we i nambawan tumas. Taem Jisas i mekem merikel blong givim kakae long bigfala hif blong man, hem i no westem ol haf kakae we i stap. Long sem fasin, yumi mas wantem blong faenem beswan rod blong yusum ol nambawan buk we oli stanap long Baebol we yumi stap kasem. (Jon 6:11-13) Tok we i stap insaed long ol buk blong yumi, i save sevem laef blong ol man. Be sipos ol buk ya oli stap nomo long kabod no long basket blong yumi, bambae tok ya i no save kasem ol man we hat blong olgeta i stret. Taswe, yumi no mas bitim mak taem yumi karem ol buk blong seremaot long wok blong prij, mo yumi mas yusum olgeta long waes fasin blong givhan long ol narafala man.—Fil. 4:5.