God i Givim Paoa Long Yumi Blong Mekem Wok Blong Hem
1 Long olgeta man blong God tede, i gat sam nomo we oli gat gudfala edukesen, mane, mo hae posisen long wol ya. From samting ya, sam man oli ting se wok blong prij we yumi mekem i nating nomo. (Aes. 53:3) Be, wok we yumi mekem blong tijim ol man long Baebol, i givim hop mo i leftemap tingting blong plante milian man finis long olgeta ples blong wol. ?Olsem wanem wan wok we ol man nating oli mekem, i save gat gudfala frut olsem? Hemia from we God nomo i givim paoa long olgeta blong mekem wok ya. (Mat. 28:19, 20; Wok 1:8) Aposol Pol i talem se: “[God] i jusumaot ol samting we ol man blong wol oli stap talem se oli no gat paoa, blong mekem ol man we oli gat paoa oli sem.”—1 Kor. 1:26-29.
2 Long faswan handred yia, plante long ol aposol mo ol narafala Kristin oli ‘no gat nem mo oli no skul gud.’ (Wok 4:13) Nating se i olsem, oli gohed wetem strong tingting blong mekem wok blong talemaot gud nius we Jeova i givim long olgeta, mo Hem i blesem hadwok blong olgeta. Nating se sam man oli agensem olgeta mo oli mas winim sam narafala samting we i blokem olgeta, be “tok blong [Jeova] i stap goaot moa long evri ples, i stap kam strong moa oltaem.” I no gat samting we i save stopem wok ya, from we wok ya i blong God. (Wok 5:38, 39; 19:20) Samting ya i sem mak long taem blong yumi. Sam lida blong wol we oli gat paoa oli agensem wok blong yumi strong, be oli no save blokem gud nius we i stap goaot moa long evri ples mo i stap kam strong moa oltaem.—Aes. 54:17.
3 Presem God From: ?I stret we yumi leftemap yumi from ol blesing mo gudfala frut we yumi kasem long wok blong God? Nogat. Pol i raetem tok ya long saed blong wok blong prij blong ol Kristin, i se: “Mifala ya, we mifala i stap holem ol gudgudfala samting ya we God i givim, mifala i olsem ol graonpot nomo. Nao fasin ya i stap soemaot, we paoa ya we i bigwan tumas i blong God, i no blong mifala.” (2 Kor. 4:7) Pol i luksave se hem i naf blong mekem wok blong prij nomo from paoa we God i givim.—Efes. 6:19, 20; Fil. 4:13.
4 Yumi tu, yumi luksave se yumi save mekem wok blong prij nomo from we ‘God i stap givhan long yumi oltaem.’ (Wok 26:22) Taem yumi stap prij, Jeova i stap yusum yumi long wan bigfala fasin blong seksekem olgeta nesen blong wol—wan woning blong jajmen ya we bambae i kam i no longtaem blong smasem olgeta nesen ya. (Hag. 2:7) !I wan bigfala ona long yumi blong “joen wetem God blong mekem wok blong hem” blong pikimap kakae we i rere finis long garen!—1 Kor. 3:6-9.