Tinghae Long Blesing Ya Blong Mekem Wok Blong God
1. ?Wanem tingting we plante man long wol blong Setan oli gat long saed blong wok blong prij?
1 Plante man long wol blong Setan, oli ting se wok blong prij i wan samting we i ‘krangke nomo.’ (1 Kor. 1:18-21) Sipos yumi no lukaot gud, tingting blong olgeta i save mekem tingting blong yumi i no moa strong, nao yumi kam slak long wok blong prij. (Prov. 24:10; Aes. 5:20) ?Wanem ol risen we i mekem se yumi mas tinghae long blesing ya blong stap olsem ol Witnes blong Jehova?—Aes. 43:10.
2. ?From wanem Pol i talem se wok blong prij i wan “tabu wok”?
2 Wan “Tabu Wok”: Aposol Pol i tokbaot wok blong prij se i wan “tabu wok.” (Rom 15:15, 16, NW) ?From wanem wok blong prij i wan “tabu wok”? From we taem yumi prij, i olsem se yumi “joen wetem” Jehova, ‘God ya we i tabu,’ blong mekem wok ya. Mo yumi givhan blong mekem se nem blong hem i stap tabu. (1 Kor. 3:9; 1 Pita 1:15) Jehova i luk wok blong prij we yumi mekem, se i wan ‘sakrefaes blong leftemap nem blong hem.’ Taswe, wok blong prij i wan impoten haf blong wosip blong yumi.—Hib. 13:15.
3. ?Wanem samting i mekem se wok blong talemaot gud nius i wan bigfala blesing?
3 I gat sam man nomo we oli kasem bigfala blesing ya blong talemaot gud nius. Ol enjel bambae oli glad sipos oli save mekem wok ya. Mo sipos oli mekem, bambae oli mekem long fasin we i nambawan. (1 Pita 1:12) !Be Jehova i jusum yumi, we yumi sinman mo we yumi olsem “graonpot nomo,” blong yumi kasem bigfala blesing ya!—2 Kor. 4:7.
4. ?Yumi save mekem wanem blong soemaot se yumi tinghae long wok blong prij?
4 Samting We i Impoten Moa: From we yumi tinghae long blesing ya, yumi luk wok blong prij olsem ‘samting we i impoten moa’ long laef blong yumi. (Fil. 1:10) Taswe, yumi makemaot taem evri wik blong yumi save joen long wok ya. Tingbaot wan man we i plei miusik, mo we i tinghae long janis ya blong plei long wan ban we ol man raon long wol oli save long hem. Evri taem we ban ya i plei long fored blong ol man, man ya bambae i rere gud, mo bambae hem i traehad blong kamgud moa long fasin blong hem blong plei. Long sem fasin, bambae yumi rere gud bifo we yumi go long wok blong prij. Olsemia yumi save kam naf blong “tijim ol man long trutok blong God long fasin we i stret gud,” mo bambae yumi traehad blong kamgud moa long fasin ya blong ‘tijim’ ol man.—2 Tim. 2:15; 4:2.
5. ?Hu i glad long yumi taem yumi prij?
5 Yu no mas letem tingting blong ol narafala i slakem yu. Yu mas tingbaot se i gat plante man yet long ples blong yu we oli glad taem yu go prij long olgeta. Be yumi no stap traem blong mekem man i glad long yumi. Samting we i impoten, hemia se Jehova i glad long yumi. Mo i tru, hem i glad tumas taem yumi traehad.—Aes. 52:7.