Yumi Holem Wan Samting We i Gud Tumas
1 Aposol Pol i tinghae long wok we God i givim long hem blong prij, mo hem i tokbaot wok ya se i ‘wan long ol gudgudfala samting we God i givim.’ (2 Kor. 4:7) Hem i fesem hadtaem mo fasin agens taem hem i stap mekem wok ya. Hem i no kam taed, hem i gohed nomo blong prij long eniman we i stap klosap long hem. Hem i wokbaot long leg mo i pas long sip blong go long ol ples farawe. Ol trip ya oli no isi mo oli denja tumas. ?Olsem wanem yumi save mekem sem mak long Pol mo soemaot se yumi tinghae long wok blong prij? (Rom 11:13) ?Wanem i mekem se wok blong prij i wan samting we i gud tumas?
2 Wan Samting We i Moagud i Bitim Ol Narafala Samting: Plante taem ol sas samting blong wol ya i karem trabol long man mo i givhan long man blong smoltaem nomo. Defren olgeta, wok blong prij i givhan long yumi mo ol narafala, mo i karem blesing we i stap blong olwe. (1 Tim. 4:16) Wok ya i givhan long ol man we hat blong olgeta i stret blong oli save Jeova, oli jenisim sam samting long laef blong olgeta, mo oli save putum tingting blong olgeta i stap strong long laef we i no save finis long fiuja. (Rom 10:13-15) Taem yumi tinghae long wok blong prij, yumi harem se laef blong yumi i gat mining, yumi filim se yumi mekem wan gudfala wok, mo yumi save putum tingting blong yumi i stap strong long wan gudfala fiuja.—1 Kor. 15:58.
3 Soemaot Se Yu Tinghae Long Gudfala Wok Ya: Sipos yumi rere blong lego taem mo paoa blong yumi from wan samting, hemia i soemaot se yumi tinghae long samting ya. !I wan bigfala blesing blong spenem taem mo paoa blong yumi blong presem Jeova! (Efes. 5:16, 17) Fasin blong yumi blong spenem taem i mas soem se yumi tinghae moa long ol samting long saed blong spirit i bitim ol samting long saed blong bodi. Yumi gat ol gudgudfala save blong talemaot long ol narafala. Taswe bambae yumi wantem mekem wok blong prij long fasin we yumi glad blong serem save ya, mo bambae yumi lukaot janis oltaem blong talemaot gud nius.
4 Plante taem ol man oli no haedem ol gudgudfala samting we oli sas tumas, be oli putum i stap long klia ples blong ol narafala oli save luk mo haremgud long olgeta. Sipos yumi lukluk wok blong prij olsem wan samting we i gud tumas, bambae wok ya i stap olsem wan bigfala samting long laef blong yumi. (Mat. 5:14-16) Wetem hat we i fulap long tangkiu, i gud we yumi mekem olsem aposol Pol mo tekem evri janis blong soemaot se yumi rili tinghae long wok blong prij. Yumi luk wok ya olsem wan samting we i gud tumas.