Wok blong Prij—Wan Nambawan Wok
1 Wok blong talemaot gud nyus i wan nambawan wok we Jeova i givim long yumi. (Rom 15:16; 1 Tim. 1:12) ?Yu gat tingting ya long saed blong wok ya? Yumi no mas letem ol yia we oli pas mo fasin blong samfala blong laf long yumi, i mekem se yumi no moa tinghae long hem. Fasin ya blong karem nem blong God, i wan ona we Hem i givim long sam man nomo. ?Olsem wanem yumi save mekem fasin tangkyu blong yumi long nambawan wok ya i gru?
2 Taem yumi talemaot mesej blong Kingdom, samting ya i no mekem ol man blong wol oli glad long yumi. Plante man oli no intres long wok blong yumi. Sam narafala oli laf long wok ya mo oli agensem. Fasin agens olsem, i save kam long ol man we oli wok wetem yumi, ol man we oli stap kolosap long yumi, no long sam memba blong famle tu. Long tingting blong olgeta, i olsem we skul i stap gyaman long yumi mo yumi krangke. (Jon 15:19; 1 Kor. 1:18, 21; 2 Tim. 3:12) Ol tok blong olgeta we oli no leftemap tingting, oli blong mekem yumi lusum intres long wok ya. Ale, yumi no moa gohed strong no yumi lego nambawan wok ya. Setan nao i stap leftemap ol negatif tingting ya. Hem i “satem tingting blong olgeta finis, nao oli stap long tudak. Hem i stap blokem olgeta blong oli no luk laet ya we i stap saenaot i go long olgeta. Laet ya i kamaot long gud nyus.” (2 Kor. 4:4) ?Bambae yu yu mekem olsem wanem?
3 I impoten blong rimemba, se wok blong talemaot Kingdom i moa impoten bitim ol narafala wok, we yumi wanwan i save mekem tede. Yumi gat wan mesej blong sevem laef, we man i save kasem long rod ya nomo. (Rom 10:13-15) Samting we i impoten tumas, se God i agri long yumi, be i no ol man. Negatif tingting blong wol long saed blong wok blong prij blong yumi, i no mas blokem yumi, blong yumi no strong blong talemaot gud nyus ya.—Wok 4:29.
4 Jisas i tinghae tumas long jans blong mekem wil blong Papa blong hem. (Jon 4:34) Hem i yusum laef blong hem fulwan long minista wok, mo hem i no letem ol samting blong pulum man no ol man blong agens oli mekem hem i kam slak. Oltaem, hem i putum wok blong talemaot mesej blong Kingdom long fas ples long laef blong hem. (Luk 4:43) Baebol i talem long yumi blong biaen long hem. (1 Pita 2:21) Taem yumi mekem samting ya, i olsem we yumi “stap joen wetem God blong mekem wok blong hem.” (1 Kor. 3:9) ?Yumi yusumgud nambawan jans ya we yumi gat? ?Yumi stap lukaot ol jans blong talemaot gud nyus long wok blong prij mo long ol narafala ples? Olsem ol Wetnes blong Jeova, oltaem yumi mas rere blong “talemaot nem blong hem long fes blong ol man.”—Hib. 13:15.
5 Fasin blong yumi blong joen long minista wok i dipen bigwan long tingting blong yumi. ?Yumi gat bigfala tangkyu from ol samting we Jeova i mekem finis blong yumi? ?Yumi wokem long hat blong yumi wan fasin blong laekem Jeova, we i pusum yumi blong mekem bes blong yumi long wok blong Hem? Yumi mas tingting dip long ol blesing we yumi stap kasem naoia mo long ol promes blong Jeova long saed blong fyuja. Samting ya bambae i givhan long yumi blong laekem moa Man ya we i Wokem yumi. Fasin lav olsem i pusum yumi blong mekem wan samting—gohed strong mo oltaem long wok blong talemaot Kingdom, olsem we yumi naf blong mekem. Bambae fasin blong yumi blong wok strong i soem klia se yumi laekem tumas Jeova mo ol man we oli stap kolosap long yumi.—Mak 12:30, 31.
6 Yumi soem se yumi tinghae long wan samting from fasin blong yumi blong yusum mo tokbaot samting ya. ?Yumi rili tinghae long nambawan wok ya we yumi gat, blong prij long saed blong Kingdom? ?Yumi glad tumas long minista wok blong yumi? ?Yumi gat strong tingting blong gohed long impoten wok ya, nating se samfala oli agensem yumi? Sipos yumi tinghae long nambawan wok ya, bambae yumi strong blong mekem, wetem fulhat blong yumi.—2 Kor. 4:1, 7.