Yumi Mas Tingbaot Ol Narafala​—⁠Haf 1

¹ Yumi haremgud taem yumi luk ol gudfala samting blong ol man blong Jeova, we i mekem se namba blong ol kongregesen i gru bigwan. Long sam ples, olsem long ol bigfala taon, oli yusum ol Haos Kingdom bitim mak. Samtaem, samting ya i mekem se plante kongregesen oli yusum sem Haos Kingdom nomo. Taswe, long saed blong olgeta we i mas mekem olsem, oli mas tingbaot ol narafala moa.

² Evri kongregesen we i yusum Haos Kingdom, i mas letem ples ya i stap klingud mo stretgud blong ol brata we oli yusum afta. Oli mas putum gud ol jea mo oli mas tekemaot eni buk we i stap afsaed long ples blong ol buk. Oli mas tekem ol samting we oli stap olbaot long Haos Kingdom mo oli blong sam man. Ol toelet oli mas stap klingud. Jekem sipos oli gat inaf sop, ol taoel, ol pepa toelet, mo sipos tin doti i klin gud.

³ Taem i gat plan finis blong wan narafala miting i stat smoltaem nomo biaen, olgeta we oli stap afta long faswan miting, oli no mas wet longtaem tumas sipos i no nid. Oli no mas blokem wok blong mekem nekis miting i rere. Longfala toktok wetem ol fren i save mekem se i gat fulap man i stap insaed, mo samting ya i mekem se ol brata oli let blong putum stret ol samting blong nekis miting. Maet ples blong putum ol trak raon long haos kingdom i smol. Sipos yumi aot kwiktaem, yumi soem fasin kaen, blong olgeta we oli kam insaed oli save gat wan ples blong putum trak blong olgeta. Long narasaed, sipos i no nid olgeta blong nekis miting oli no mas kam eli tumas. Olsem ya nao, i no gat tumas man we oli hivap insaed, kolosap long doa, no long ples blong putum ol trak.

⁴ Long ples we i gat plante kongregesen olsem, i gat spesel nid blong wokgud tugeta taem oli mekem plan blong klinim Haos Kingdom evri wik. Plante taem ol kongregesen ya wan afta narawan, oli gat stret taem blong ol we i stap long program. Sipos i taem blong kongregesen blong yu blong mekem wok ya, jekem sipos ol brata oli klinimgud mo oli mekem kwiktaem. Olsem ya nao, narafala kongregesen we i mas yusum Haos Kingdom i no gat wan tok nating blong talem.

⁵ Wanwan taem, i gat nid blong evri kongregesen i jenisim haoa blong miting blong hem, olsem long taem we seket elda i mekem visit. Sipos wan narafala kongregesen i trabol from, ol elda oli mas tokrere gud long kongregesen ya. Olsemia, oli save tokbaot samting ya eli inaf blong ol pablisa oli save. Mo tu, sipos i gat plan blong mekem sam samting we oli stret, olsem Skul blong Paenia, wan miting blong ol seket elda, no wan mared, oli mas tokrere long ol narafala kongregesen mo long eni seket elda we i trabol from. Olsemia, bambae oli no mekem plan blong yusum Haos Kingdom long semtaem.

⁶ I gat plante kongregesen we oli blong defren seket, be oli yusum sem Haos Kingdom nomo. I impoten tumas blong ol seket elda we oli visitim ol Haos Kingdom ya, oli advaesem ol narawan long saed blong taem blong ol nekis visit blong olgeta. Taem tu seket elda oli mekem plan blong mekem visit long sem wik, samting we i kamaot se: oli mas stretem ol samting long las menet no i gat sam narafala trabol from.

⁷ Fasin blong laekem mo blong tingbaot ol narafala, fasin blong toktok, blong mekem plan eli, mo blong wokgud tugeta, ol fasin ya oli save givhan blong holemgud long ol gudfala fasin fren bitwin ol kongregesen. Bambae samting ya i givhan tu, blong “mekem olgeta samting long fasin we i stret gud, we ol man oli glad long hem.”​—⁠1 Kor. 14:⁠40.