Yumi Mas Gat Tingting Olsem Jisas
1. ?Wanem tingting we Jisas i soemaot?
1 Nating se yumi no luk Pikinini blong God samtaem, be yumi save lanem blong lavem hem from ol save we yumi kasem long Baebol long saed blong laef blong hem mo wok blong prij we hem i mekem. (1 Pita 1:8) Blong mekem samting we Papa blong hem i wantem, hem i livim hae posisen blong hem long heven mo i kamdaon long wol ya. Hem i kam olsem man nomo, hem i rere blong lego samting we hem i wantem blong tijim ol narafala, nao biaen hem i givim laef blong hem blong sevem ol man. (Mat. 20:28) Tok blong God i talem se: “Tingting blong yufala i mas kam stret gud wetem tingting blong Jisas Kraes.” ?Olsem wanem yumi save folem fasin blong hem blong tingbaot narafala fastaem i bitim we yumi tingbaot yumi wan nomo?—Fil. 2:5-8.
2. ?Wanem traem we i kasem plante Kristin, mo wanem i save givhan long olgeta blong winim traem ya?
2 Taem Yumi Taed: Nating se Jisas i stretgud olgeta, hem i kam taed. Wan taem, hem i “taed tumas from we hem i wokbaot i kam long longfala rod.” Be nating, hem i tektaem blong prij long wan woman Sameria. (Jon 4:6) Plante Kristin tede oli fesem semfala traem ya. Oli taed from we klosap evri dei oli wok, ale oli harem se oli no moa gat paoa blong go prij. Be, sipos yumi folem fasin ya blong go prij evri wik, bambae yumi faenem se wok blong prij i givim paoa long yumi mo i mekem yumi haremgud long saed blong spirit.—Jon 4:32-34.
3. ?Olsem wanem yumi save folem fasin blong Jisas we i glad blong tijim ol man?
3 Wan taem bakegen, Jisas mo ol disaepol blong hem oli go blong spel smol long wan ples we i no gat man. Be wan bigfala hip man i faenemaot weples bambae oli go long hem, nao oli resis i gotru fastaem. Be Jisas i no kros long olgeta. Hem i “sore tumas long olgeta,” nao hem i “stat tijim olgeta long plante samting.” (Mak 6:30-34) Blong statem ol Baebol stadi mo blong gohed oltaem blong mekem olgeta, yumi nidim semfala tingting ya olsem Jisas. Yumi mas hadwok, yumi mas gat longfala tingting, mo yumi mas rili lavem ol man. Sipos yu yu no gat wan Baebol stadi yet, yu mas gohed nomo blong traem faenem wan, yu no mas stop.
4. ?Olsem wanem wok blong haftaem paenia i save halpem yumi blong gat semfala tingting olsem Kraes?
4 Putum Ol Samting Long Saed Blong Spirit Long Fasples: Wok blong haftaem paenia i save givhan long yumi blong tingting moa long ol samting long saed blong spirit. Wan yangfala sista i raetem se: “Wan fren blong mi, mama blong hem i haftaem paenia blong wan manis, nao i pulum mi wetem gel blong hem blong joenem hem. Mi mi glad tumas we mitufala i mekem olsem. Mi haremgud se mi gat janis blong save moa ol brata mo sista, kwiktaem nomo oli kam olsem prapa famle blong mi. Mi haremgud tu blong gat plante moa janis blong toktok wetem ol narafala long saed blong Jeova, mo blong tijim olgeta long ol nambawan trutok blong Kingdom. Olgeta samting ya i mekem mi mi harem se mi klosap moa long Jeova mo ogenaesesen blong hem.”—Sam 34:8.
5. ?From wanem yumi mas traehad oltaem blong gat sem tingting olsem Kraes?
5 Wan faet i stap gohed insaed long yumi evriwan, hemia se, sin we i stap long bodi blong yumi i stap faet agens long gudfala tingting blong yumi blong wantem mekem Jeova i glad. (Rom 7:21-23) Yumi mas sakemaot spirit blong wol ya, we i blong mekem i gud long yumi wan mo blong no wok strong tumas. (Mat. 16:22, 23) Jeova i save givim tabu spirit long yumi blong halpem yumi blong sakemaot spirit ya blong wol. (Gal. 5:16, 17) Taem yumi stap wet long niufala wol we stret fasin nomo i stap long hem mo we God bambae i mekem yumi kamfri olgeta, i gud yumi kasem sem tingting olsem Jisas mo putum ol samting long saed blong Kingdom i stap fastaem long ol narafala samting we yumi nomo i wantem.—Mat. 6:33; Rom 15:1-3.