Distrik Asembli i Pulum Yumi Blong Wokbaot Wetem God
!Distrik Asembli ya “Wokbaot Wetem God” i soemaot gud ol klia tok ya blong Jeova se: “Hemia rod. Yufala i folem”! (Aes. 30:21) Sipos yumi folem ol advaes we yumi harem, hemia bambae i givhan long yumi blong ‘lukaot gud long ol fasin blong yumi.’ (Efes. 5:15) Sipos yumi tingting dip long ol samting we yumi lanem, samting ya bambae i halpem yumi taem yumi “stap folem ol tok we i tru.”—3 Jon 3.
Yusum ol kwestin we oli kam biaen wetem ol prapa not blong yu we yu raetem long asembli, blong rere mo ansa taem yumi tingting bak long program blong asembli blong yumi long yia ya. Bambae yumi tingting bak long asembli ya long Miting Blong Kingdom Wok long wik blong Oktoba 18.
1. ?Olsem wanem Inok i naf blong wokbaot wetem God nating se hem i bin laef long trabol taem? (Hib. 11:1, 5, 6; Jud 14, 15; “Wokbaot Wetem God Long Trabol Taem Ya”)
2. ?Yumi save mekem rul blong Luk 16:10 i wok long wanem haf blong laef blong yumi? (“?Yu Yu Stap ‘Mekem i Stret Long Ol Smosmol Samting Tu’?”)
3. (a) Talem fo gudfala lesen long Hosea japta 6 kasem japta 9 we oli save givhan long laef blong yumi blong yumi wokbaot wetem God. (Hos. 6:6, 7; 7:14; 8:7) (b) ?Wanem sam narafala poen bakegen long Hosea japta 10 kasem japta 14 we oli save givhan long yumi blong wokbaot wetem God? (“Profet Tok Blong Hosea i Halpem Yumi Blong Wokbaot Wetem God”—Tok We i Gat Tri Haf Long Hem)
4. ?Wanem gudfala samting we ol Kristin hasban mo waef oli save mekem blong mekem mared blong olgeta i stap strong? (Prov. 12:4; Efes. 5:29; “No Brekem Mared Blong Man Mo Woman We ‘God i Joenem’ ”)
5. ?Olsem wanem yumi soemaot respek long ol tabu miting blong yumi? (Pri. 5:1; Aes. 66:23; “Soem Respek Long Ol Tabu Miting Blong Yumi”)
6. (a) ?Wanem trifala impoten haf blong wok blong prij we yumi mas tingting gud long olgeta blong meksua se yumi stap joen fulwan long hem? (Aes. 52:7; Sek. 8:23; Mak 6:34) (b) ?Wanem ol poen long saed blong buk ya Good News for People of All Nations we yu luk se i save givhan long yu? (“Gud Nius Blong Ol Man Blong Olgeta Kantri”; “Halpem Ol Man We Oli Toktok Narafala Lanwis”)
7. ?Olsem wanem yumi save halpem ol niuwan blong oli no fraet taem oli talemaot Kingdom? (Jaj. 7:17; “Halpem Plante Moa Man Blong Oli Joen Wetem Yumi Long Wok Blong Prij”)
8. ?Olsem wanem yumi soemaot se yumi bilif we “Bigfala Dei ya blong Hae God i kam klosap finis”? (Sef. 1:14; “Yumi Wokbaot From We Yumi Bilif, i No From Samting We Yumi Luk”)
9. (a) ?I rili wan nogud samting blong mekem ol narafala oli foldaon? (Mak 9:42-48) (b) ?Olsem wanem blong no letem narafala i mekem yumi foldaon? (Sam 119:165) (c) ?Olsem wanem blong no mekem narafala i foldaon? (1 Kor. 10:24; “Lukaot Blong ‘No Mekem Fasin We Narafala i Save Foldaon Long Hem’ ”)
10. ?Olsem wanem yumi save gat fasin blong skelemgud ol samting taem yumi lukaot wan blong mared wetem, taem yumi traehad blong gat gudfala helt, mo taem yumi mekem bisnes? (Sam 26:4; Mat. 6:25; 1 Tim. 6:9; “Tingting Blong Yufala i Mas Klia Gud”)
11. (a) ?Wanem samting yumi save makem gud long saed blong olgeta taem we Jisas i haremgud from ol narafala we oli tekem hem i go long haos blong olgeta? (Luk 10:42; 24:32) (b) ?Taem yumi spel mo pleplei, olsem wanem yumi save mekem long rod we i givim paoa long yumi mo ol narafala? (1 Kor. 10:31-33; “Ol Gudfala Wok We Oli Save Mekem Yu Yu Haremgud”)
12. ?Folem Sam 23, wanem ol blesing we yumi ol sipsip blong Jeova, yumi kasem, mo wanem ol responsabiliti blong yumi? (1 Kor. 10:21; “Jeova i Lidim Yumi Olsem Man Blong Lukaot Long Ol Sipsip”)
13. ?Olsem wanem ol Kristin oli lesin long advaes ya blong Baebol se oli ‘mas yusum evri janis we [oli] kasem blong mekem ol gudfala wok’? (Efes. 5:16; “Yusum Evri Janis Blong Mekem Ol Gudfala Wok”)
14. (a) ?Tok ya ‘taem blong jajem olgeta man’ we i stap long Revelesen 14:7 i minim wanem? (b) ?Olsem wanem yumi soemaot se yumi rili seraot long Bigfala Babilon? (“ ‘Yufala i Mas Lukaot Gud’—Taem Blong Jajem Man i Kam Finis”) (c) ?Wanem ol poen we yu yu laekem long buklet ya Keep on the Watch!?
15. Talem tri stamba fasin we yumi nidim blong yumi no “lego stret rod.” (2 Pita 2:15; “Lukaot Se Yu No ‘Lego Stret Rod’ ”)
16. ?Olsem wanem ol yangfala oli save ronwe long “rod ya, we ol man nogud oli stap folem”? (Prov. 4:14; “Ol Yangfala—Wokbaot Long Rod Blong Stret Fasin”)
17. (a) ?Long wanem rod, Pol i wan nambawan eksampol blong fasin blong stanap strong? (Wok 14:19, 20; 16:25-33) (b) ?From wanem i no nid blong fraet long olgeta we oli agensem trufala wosip? (Drama mo tok ya “Givim Bigfala Witnes Tede Nating Se Samfala i Agensem Yumi”)
18. ?Olgeta we oli wokbaot wetem God oli kasem wanem blesing? (“Wokbaot Wetem God Mo Kasem Blesing Naoia Mo Blong Olwe”)
Yumi mas gat strong tingting blong lesin long ‘voes biaen long yumi,’ nao bambae yumi wokbaot wetem Papa blong yumi long heven blong olwe.—Aes. 30:21; Jon 3:36.