Haf 3—Givhan Long Ol Baebol Stadi Blong Oli Gohed Gud
Yusum Gud Baebol
1. ?From wanem i impoten blong yusum Baebol taem yumi mekem ol Baebol stadi?
1 Taem yumi mekem ol Baebol stadi, mak blong yumi i blong ‘pulum ol man oli kam man blong Jisas.’ Yumi mekem olsem taem yumi halpem ol man blong oli kasem save long ol tijing blong Baebol mo blong oli mekem i wok long laef blong olgeta. (Mat. 28:19, 20; 1 Tes. 2:13) Taswe, taem yumi mekem stadi, yumi mas yusum Baebol. Fastaem, maet i gud blong soemaot long ol studen olsem wanem blong faenem wan vas long prapa Baebol blong olgeta. ?Be, olsem wanem yumi save yusum Baebol blong givhan long olgeta blong oli gruap long saed blong spirit?
2. ?Olsem wanem yu save jusum ol vas blong Baebol we bambae yu ridim mo tokbaot wetem studen?
2 Jusumaot Sam Vas: Taem yu stap mekem rere stadi, yu mas faenemaot olsem wanem ol wanwan vas oli joen wetem ol poen we bambae yu tokbaot long studen, mo yu mas jusumaot olgeta we bambae yufala i ridim mo tokbaot long taem blong stadi. Plante taem i moa gud blong ridim ol vas we oli pruvum se ol bilif blong yumi oli stanap long Baebol. Maet i no nidim blong ridim ol vas we oli jes ademap sam moa save long poen we yufala i stap tokbaot. Yu mas tingbaot nid blong ol wanwan studen mo fasin blong laef blong olgeta.
3. ?From wanem ol kwestin oli gud, mo olsem wanem yumi save yusum olgeta?
3 Yusum Ol Kwestin: I moagud blong letem studen i eksplenem ol vas blong Baebol long yu, i bitim we yu yu eksplenem long hem. Yu save pulum hem blong mekem olsem taem yu yusum ol gudfala kwestin. Sipos i isi nomo blong studen i luksave rod blong mekem wan vas blong Baebol i wok long laef blong hem, maet yu save askem nomo se olsem wanem vas ya i laenap wetem samting we paragraf i talem. Long sam narafala vas, maet i nidim wan, no plante kwestin blong mekem studen i kasem klia save. Sipos i nidim blong talem sam moa samting, yu save mekem olsem afta we hem i givim ansa.
4. ?I nidim blong yumi talem plante samting blong eksplenem wan vas, no nogat?
4 Klia Mo Isi Blong Kasem Save: Plante taem, wan man we i gat gudhan blong sut long ara, i nidim wan ara nomo blong kasem mak blong hem. Long sem fasin, wan tija we i gat gudhan i no nidim plante toktok blong makem wan poen. Hem i save givimaot save long fasin we i isi blong kasem save long hem, i klia gud, mo i stret. Samtaem, maet yu nidim blong lukaotem sam moa save long ol Kristin buk, blong kasem save wan vas blong Baebol mo eksplenem vas ya long fasin we i stret. (2 Tim. 2:15) Be yu no mas traem blong eksplenem evri smosmol poen blong ol wanwan vas we oli stap long stadi. Yu mas yusum olgeta nomo we yu nidim blong makem poen we yu stap tokbaot.
5, 6. ?Olsem wanem yumi save halpem ol studen blong oli mekem Tok blong God i wok long laef blong olgeta, be yumi no mas mekem wanem?
5 Soemaot Olsem Wanem Blong Mekem Save i Wok: Long taem we yu luk se i stret, halpem studen blong luksave olsem wanem ol vas blong Baebol oli save wok long laef blong hem. Olsem nao, sipos yu stap tokbaot Hibrus 10:24, 25 long wan studen we i no joen yet long ol Kristin miting, maet yu save tokbaot wan long ol miting mo invaetem hem blong kam long miting ya. Be yu no mas fosem hem. Yu mas letem Tok blong God nomo i pusum hem blong mekem wok we hem i mas mekem, nao Jeova i save glad long hem.—Hib. 4:12.
6 Taem yumi stap folem oda ya blong mekem disaepol, i gud yumi yusum Baebol oltaem blong mekem ol studen ‘oli bilif long hem, oli obei long hem.’—Rom 16:26.