Prij Long Ol Famle—?Olsem Wanem?
1. ?From wanem i nidim fasin luksave taem yumi prij long ol famle?
1 !Bambae yumi glad tumas sipos ol famle blong yumi we yumi laekem olgeta tumas oli go insaed long niufala wol wetem yumi, mo yumi joengud wetem olgeta blong wosipim Jeova! Gudfala hop ya i save kamtru sipos yumi prij long olgeta. Be i nidim fasin luksave blong prij long wan rod we oli save haremgud long hem. Wan seket elda i talem se: “Olgeta we oli prij long famle blong olgeta oli kasem beswan frut sipos wanwan taem oli tokbaot trutok long olgeta, blong wekemap intres blong olgeta.” ?Olsem wanem yumi save mekem olsem?
2. ?Sipos yumi rili intres long ol famle blong yumi, olsem wanem fasin ya i save pulum olgeta blong wantem save moa?
2 Wekemap Intres Blong Olgeta: Fastaem yu mas tingting gud blong save olsem wanem yu save wekemap intres blong famle blong yu. (Prov. 15:28) ?Olgeta oli wari long wanem samting? ?Oli stap fesem wanem traem? Maet yu save soemaot wan magasin no tokbaot wan gudfala vas we i stret long wan spesel samting we oli intres long hem. Sipos ol famle blong yu oli stap farawe, maet yu save raetem leta no yusum telefon blong mekem olsem. Long wan fasin we yumi no mekem i hevi tumas long olgeta, yumi planem sid blong trutok, mo yumi lukluk i go long Jeova blong i mekem sid ya i gru.—1 Kor. 3:6.
3. ?Long saed blong intres we ol famle blong yumi oli gat long yumi, olsem wanem samting ya i save openem rod blong prij long olgeta?
3 Jisas i bin ronemaot plante devel long wan man nao i talem long hem se: “Yu gobak long ples blong yu. Yu go talemaot long ol man ples blong yu, ol samting ya we Hae God i mekem long yu, we hem i sore tumas long yu.” (Mak 5:19) !Tingbaot olsem wanem samting ya i mas gat paoa long ol famle blong man ya! Nating sipos wan bigfala samting olsem i no hapen long yu, be maet ol famle blong yu oli intres long ol wok we yu mo ol pikinini blong yu, yufala i stap mekem. Sipos yu tokbaot wan tok we yu bin mekem long Tiokratik Skul, wan asembli we yu bin go long hem, taem we yu go visitim Betel, no wan narafala bigfala samting we i hapen long laef blong yu, maet samting ya i save openem rod blong yu tokbaot moa Jeova mo ogenaesesen blong hem.
4. ?Yumi no mas foldaon long wanem trap taem yumi prij long ol famle?
4 Mas Gat Fasin Luksave: Taem yumi prij long ol famle, yumi no mas tokbaot plante samting wantaem nomo. Wan brata i tingbaot taem we hem i stat stadi mo hem i talem se: “Long taem ya, mi mi spenem plante aoa wetem mama blong mi blong eksplenem klosap evri samting we mi lanem long Baebol. Plante taem rao i kamaot from, antap moa wetem papa blong mi.” Maet wan famle i soemaot se hem i intres long Baebol, be long taem ya tu yu no mas talem plante tumas samting long hem wantaem nomo. Oltaem yu mas mekem se bambae hem i glad blong save sam moa samting long nekiswan taem we yu gat janis blong toktok wetem hem. (Prov. 25:7) Oltaem yu mas soemaot respek, kaen fasin, mo longfala tingting, olsem yu stap mekem taem yu toktok wetem ol narafala man long wok blong prij.—Kol. 4:6.
5. ?Yumi mas mekem wanem sipos ol famle oli no glad taem yumi prij long olgeta?
5 I gat wan taem we ol famle blong Jisas oli ting se hem i lusum tingting blong hem. (Mak 3:21) Be biaen, sam long olgeta oli kam man blong bilif. (Wok 1:14) Sipos fastaem ol famle blong yu oli no glad taem yu tokbaot trutok long olgeta, yu no mas lego. Laef mo fasin blong olgeta i save jenis. Yu mas traem faenem wan narafala rod bakegen blong tokbaot wan poen we maet i wekemap intres blong olgeta. Maet yu save kasem bigfala glad from we yu givhan long olgeta blong oli stat wokbaot long rod blong laef we i no save finis.—Mat. 7:13, 14.