Talem Tangkiu Long Jeova From Lav Mo Kaengud Fasin Blong Hem
Bambae Yumi Tingbaot Ded Blong Jisas Long Maj 24
1. ?Olsem wanem Jeova i soemaot lav blong hem long yumi?
1 Man blong raetem Ol Sam i talem se: “I gud [ol man] oli talem tangkiu long Hae God from fasin blong hem we oltaem hem i lavem olgeta tumas, mo from ol bigbigfala samting we hem i stap mekem blong givhan long olgeta.” (Sam 107:8) Lav blong God i bitim fasin ya we hem i kaen long ol man. Yumi luk samting ya long tok we man blong raetem Ol Sam i talem blong presem God, i se: “Yu yu holem mi mi stap gud, from we oltaem yu yu lavem mi tumas.” (Sam 94:18) !Jeova i soemaot bigfala lav ya taem hem i givim Pikinini blong hem, wan nomo we hem i gat, blong sevem yumi!—1 Jon 4:9, 10.
2. ?Olsem wanem yumi soemaot tangkiu long Jeova?
2 ?Taem dei blong Memoriol i stap kam klosap, olsem wanem yumi save talem tangkiu long God ya we ‘oltaem i lavem yumi’? (Sam 59:17) Bambae yumi wanwan yumi mas makemaot taem blong yumi save tingting dip long ol laswan dei blong laef blong Jisas long wol ya. (Sam 143:5) I gud tu sipos yumi folem spesel Baebol riding we i laenap wetem Memoriol ya, olsem i stap long buk ya Ridimgud Ol Tok Blong Baebol Evri Dei—2005, mo sipos yumi naf, yumi ridim mo stadi long ol japta 112-116 blong buk ya Man We i Hae Moa, mo long sam narafala buk bakegen. Tektaem blong tingting dip long ol haf we yu ridim, mo putum tingting blong yu i stap strong long hem. (1 Tim. 4:15) Taem yumi stadi long Tok blong God mo yumi prea, yumi save givhangud long hat blong yumi, be antap moa, yumi stap soemaot long Jeova se yumi lavem hem.—Mat. 22:37.
3, 4. (a) ?Olsem wanem yumi save folem fasin blong ol brata blong yumi long Laeberia? (b) ?Yu yu mekem plan blong singaotem hu i kam long Memoriol?
3 Halpem Ol Narafala Blong Oli Talem Tangkiu: Las yia, i gat 16,760,607 man we oli joen long Memoriol long olgeta ples blong wol. Long wan vilej long Laeberia, ol brata oli raetem leta i go long jif, mo oli talem long hem se bambae oli mekem wan miting blong tingbaot ded blong Jisas. Jif ya i givim raet long olgeta blong oli yusum futbol fil mo hem i mekem wan tok save i goraon long olgeta ples, i singaot ol man blong oli kam long miting ya. !Nating se i gat faef pablisa nomo long vilej ya, be 636 man oli joen long Memoriol!
4 Long sem fasin, yumi wantem halpem plante moa man blong oli joen wetem yumi long Memoriol. I gud sipos yu mekem wan lis blong ol man we yu wantem invaetem. Long laswan pej blong Wajtaoa blong Maj 15 i gat wan haf we i singaotem ol man blong oli kam long Memoriol. Yumi save yusum ol smol pepa tu blong singaot ol man. Raetem gud taem mo ples blong Memoriol long pepa ya, mo givimaot long ol wanwan man we yumi invaetem. Taem Maj 24 i kam klosap, yumi mas gobak long olgeta blong mekem se oli no foget mo blong mekemgud plan wetem olgeta.
5. ?Olsem wanem yumi save leftemap tingting blong ol Baebol studen blong oli joen long Memoriol?
5 ?Olsem wanem yumi save halpem ol Baebol studen we oli no joen yet long ol miting, blong oli kam long Memoriol mo oli haremgud fulwan long hem? Long evri stadi, yumi mas spenem sam menet blong givhan long olgeta blong oli kasem save se Memoriol i impoten tumas. Long Wajtaoa blong Maj 15, 2004, pej 3-7, mo Reasoning buk, pej 266-269 (Franis, pej 241-245), i gat ol nambawan save we yumi save yusum.
6. ?From wanem i impoten blong welkamem ol niuwan long taem blong Memoriol?
6 Welkamem Ol Niuwan: Long taem blong Memoriol, yumi mas toktok wetem ol niuwan mo welkamem olgeta. (Rom 12:13, NW ) Mekem plan blong sidaon klosap long olgeta we yumi invaetem, mo jekem sipos oli gat wan Baebol mo singbuk. I impoten tumas we yumi welkamem eni brata mo sista we oli slak be oli bin mekem bigfala traehad blong joen long miting ya. Maet fasin blong yumi blong soem lav mo intres long olgeta i givhan long olgeta blong oli joen bakegen long kongregesen. (Luk 15:3-7) Long spesel taem ya we i tabu tumas, i gud yumi evriwan i mekem bes blong yumi, blong leftemap tingting blong ol narafala blong oli joen wetem yumi blong talem tangkiu long Jeova from we ‘oltaem hem i lavem yumi tumas.’—Sam 31:21.