Haf 10—Givhan Long Ol Baebol Stadi Blong Oli Gohed Gud
Trenem Ol Studen Long Wok Blong Prij
1 Taem ol elda oli talemaot se wan Baebol studen i naf blong kam wan pablisa we i no baptaes, studen ya i save stat blong joen wetem kongregesen blong prij. (Lukluk Organized to Do Jehovah’s Will, pej 79-81, long Franis Organisés pour faire la volonté de Jéhovah.) ?Olsem wanem yumi save givhan long ol studen blong oli kasem mak ya blong prij long ol haos wanwan?
2 Tija Mo Studen Tufala i Mekem Rere Tugeta: I impoten blong reregud. Soem long studen weples hem i save faenem ol fastok blong prij long Kingdom Wok Blong Yumi mo long buklet ya Statem Ol Storian. Biaen, halpem hem blong jusum wan fastok we i isi mo i stret long ples blong yufala. Taem hem i jes stat blong prij, leftemap tingting blong hem blong yusum Baebol.—2 Tim. 4:2.
3 Sipos niufala pablisa i mekem pleplei long haos blong lanem olsem wanem blong prij, hemia bambae i givhan long hem. Taem hem i stap mekem pleplei ya, soem long hem olsem wanem hem i save ansa wetem kaen fasin long ol toktok we ol man ples oli stap talem oltaem blong blokem yumi. (Kol. 4:6) Mekem hem i kasem save se ol Kristin we oli stap prij, oli no nid blong save ansa blong evri kwestin we maet wan man i askem long wok blong prij. Plante taem i moagud we oli talem se bambae oli go stadi moa long kwestin ya mo kambak blong storian long saed ya.—Prov. 15:28.
4 Prij Tugeta: Faswan taem we studen i prij long ol haos wanwan, letem hem i wajem olsem wanem yu yu toktok folem pleplei we yutufala i bin rere long hem. Biaen, talem long hem blong hem tu i tokok. Samtaem, maet i moa gud sipos studen i jes toktok smol nomo, olsem ridim mo tokbaot wan vas. I gud blong tingbaot fasin blong hem mo samting we hem i naf blong mekem. (Fil. 4:5, NW ) Taem yu trenem hem sloslo long olgeta haf blong wok blong prij, oltaem yu mas talem ol gudfala toktok long hem from ol traehad blong hem.
5 I impoten blong givhan long niufala pablisa blong hem i stanemap wan program blong joen oltaem long wok blong prij, i gud we hem i no mestem wan wik. (Fil. 3:16) Mekem wan stret plan blong yutufala i prij tugeta, mo leftemap tingting blong hem blong i prij wetem ol narafala pablisa tu we oli gat gat strong tingting long wok blong prij. Eksampol mo fasin fren blong olgeta bambae i givhan long hem blong kamgud moa blong prij long ol haos wanwan mo blong faenem glad long wok ya.